Këshilli i Lartë i Prokurorisë, KLP njoftoi të hënën axhendën e mbledhjes plenare që do të zhvillojë të mërkurën, ku ndër të tjera do të diskutohet dhe pritet të kalojë për miratim, edhe projekt-vendimi “Për shpalljen e vendit vakant për pozicionin e drejtuesit të Prokurorisë së Posaçme kundër Korrupsionit dhe Krimit të Organizuar. Mandati trevjeçar i drejtuesit aktual, Altin Dumani përfundon më datë 16 dhjetor. Altin Dumani e mori detyrën tre vjet me parë, kur ai u shpall fitues kundrejt dy kandidatëve të tjerë, Edvin Kondili dhe Adnan Xholi.
Gjatë mandatit të Dumanit, SPAK ka shënuar disa arritje në luftën kundër korrupsionit në nivele të larta dhe ndaj krimit të organizuar. Në disa prej çështjeve, prokurori Altin Dumani është bërë edhe vetë pjesë e hetimit dhe përfaqësimit të tyre në gjykatë.
I pari që drejtoi SPAK-un në fillimet e tij, ishte prokurori Arben Kraja. Afro gjashtë vjet më parë, Kraja arriti të merrte shumicën e votave të këshillit, duke administruar procesin e krijimit të Strukturës së Posaçme, që ka si qëllim luftën kundër korrupsionit në nivele të larta dhe ndaj krimit të organizuar.
Drejtuesi i Prokurorisë së Posaçme është drejtuesi administrativ i SPAK dhe ka për kompetencë që t’u caktojë çështjet prokurorëve, bazuar në specializimin e tyre, si dhe të nxjerrë udhëzime jodetyruese për çështje penale konkrete. Po ashtu, ai koordinon punën me agjencitë e tjera të zbatimit të ligjit dhe parnterët ndërkombëtarë. Gjithashtu, drejtuesi mund të jetë pjesë e hetimeve.
Për pozicionin e drejtuesit të SPAK, mund të konkurrojnë të gjithë prokurorët e kësaj prokurorie, të cilët nuk kanë mbajtur pozicionin e drejtuesit në mandatin e fundit.
