Sipas propozimeve, numri i komisioneve të përhershme do të rritet nga 8 në 11 dhe një prej komisioneve më të rëndësishme, ai për Integrimin Europian do të shkrihet me komisionin e Punëve të Jashtme.
Partia Demokratike i kundërshtoi propozimet dhe shkrirjen e komisionit të Integrimit që e drejtonte ajo, duke akuzuar mazhorancën se ka përjashtuar opozitën nga procesi i integrimit.
“Mekanizmi që kishte në dorë opozita zerohet,” tha Gazment Bardhi, kryetar i grupit parlamentar demokrat.
“Shqipëria i pari vend që përjashton opozitën dhe që nuk ka komision të dedikuar për integrimin kur e ka prioritet procesin,” shtoi ai.
Kryetari i sapozgjedhur i Kuvendit, Niko Peleshi, thirri një takim konsultativ me kryetarët e dy grupeve kryesore parlamentare, Taulant Ballën nga PS dhe Bardhin nga PD, nga i cili palët dolën me qëndrime të kundërta.
“Për ne është e papranueshme që në Asamblenë e Partisë Socialiste të njoftohet publiku për organizimin e Kuvendit, kur janë organizma të përbashkëta pune të opozitës dhe mazhorancës,” tha Bardhi për mediat.
Ai e cilësoi ‘faktin e kryer’ me emërimet e kryetarëve të komisioneve të reja ende pa u miratuar ato, si tregues të “frymën autoritare” që Edi Rama ka instaluar në vend.
Kreu i Grupit Parlamentar të PS-së mbrojti formulën e re të ndarjes së komisioneve dhe shkrirjen e komisionit të Integrimit, si një synim për ta forcuar procesin e integrimit në BE.
“Është ngritje në nivelin më të lartë të mundshëm… në fazën ku ndodhet Shqipëria, ku kërkohet integrim në BE gjatë viteve në vijim, Komisioni për Integrimin duhet t’i takojë mazhorancës,” tha ai për mediat.
Komisioni i Integrimit ka funksionuar që në vitin 2004 me qëllim shqyrtimin e nismave ligjore në raport me direktivat e BE-së (Acquis communautaire). Opozita po ashtu drejton Këshillin Kombëtar për Integrimin, një strukturë ekstra parlamentare, ku merr pjesë shoqëria civile, institucionet e drejtësisë, përfaqësues të BE-së. Kjo strukturë ende nuk dihet nëse do të ekzistojë në formën që është.
Rregullorja e Kuvendit është një dokument që kërkon konsensus politik për t’u ndryshuar pasi propozimet për të shqyrtohen nga Këshilli për Rregulloren, Mandatet dhe Imunitetin, i përbërë nga 10 deputetë me përfaqësim të barabartë mes mazhorancës dhe opozitës.
Por, duket se socialistët kanë vendosur t’i miratojnë në mënyrë të njëanshme pasi në mbledhjen e grupit parlamentar të hënën ‘emëruan’ dhe kryetarët socialistë të komisioneve të reja.
PS fitoi një mandat të 4-t qeverisës në 11 maj me 83 mandate, një numër që mund të përdoret për të miratuar dhe ndryshime ligjore që kërkojnë shumicë të cilësuar votash.
