Një punëtor 36-vjeçar, i identifikuar si Anton Zefi, humbi jetën pasditen e së enjtes pasi ra nga lartësia në një kantier ndërtimi në zonën e Kunës në Shëngjin. Ngjarja ndodhi rreth orës 16:30. Sipas policisë, viktima, banues në fshatin Pllanë të njësisë administrative Shënkoll, ra aksidentalisht në boshtin e ashensorit të pallatit në ndërtim. Ky është rasti i katërt i vdekjes nga aksidentet në punë në këtë zonë brenda një viti.
Nga hetimet paraprake rezulton se 36-vjeçari, për shkak të rënies, mori plagë të shumta në pjesë të ndryshme të trupit, të cilat i shkaktuan vdekjen e menjëhershme.
Menjëherë pas marrjes së njoftimit, në vendngjarje mbërritën shërbimet e Policisë dhe ato zjarrfikëse, të cilat bënë të mundur nxjerrjen e trupit. Ai u dërgua për ekspertizë të mëtejshme mjeko-ligjore në morgun e Spitalit Rajonal të Lezhës.
Sipas policisë, grupi hetimor, nën drejtimin e Prokurorisë, po mbledh çdo provë dhe dëshmi për të përcaktuar nëse janë respektuar rregullat e sigurisë në punë në objektin në ndërtim. Në vendngjarje mbërritën gjithashtu përfaqësues të Inspektoriatit të Punës, të cilët kanë nisur analizën e tyre për kushtet teknike dhe të sigurisë në kantier.
Aksidentet me pasojë vdekjen në vendin e punës, veçanërisht në sektorin e ndërtimit, mbeten një problem sistemik dhe plagë e vazhdueshme në Shqipëri. Raportime të mëparshme dhe të dhëna nga autoritetet tregojnë se mungesa e masave të sigurisë teknike, veçanërisht për punën në lartësi, është shkaku kryesor i këtyre tragjedive. Shpesh, përgjegjësia për këto ngjarje mbetet “jetime” ose u atribuohet viktimave, ndërkohë që tregu informal i punës, i theksuar edhe në qarkun e Lezhës, e rrit më tej rrezikshmërinë për punëtorët.
Rasti i së enjtes në Shëngjin thellon bilancin tragjik në këtë zonë. Sipas të dhënave, aksidentet në punë kanë qenë të shpeshta në zonën turistike të Shëngjinit, ku ka fluks ndërtimesh të reja.
Deputeti i opozitës në Lezhë, Gjin Gjoni, fajësoi qeverinë dhe autoritetet për mungesë vëmendjeje dhe lejimin e ndërtimeve në shkelje të kushteve teknike dhe pa leje.
“Kjo është viktima e katërt brenda një viti nga aksidentet në punë në zonën e Shëngjinit. Ndërkohë, ndërtimet shumëkatëshe po ngrihen pa asnjë kriter teknik, shpesh pa leje, dhe me bekimin e institucioneve që duhet të jenë roje të ligjit, jo bashkëpunëtorë të shkeljes së tij”, shkroi Gjoni. Ai pretendoi se ndërtimet në këtë zonë ishin pa leje ose me leje të falsifikuara dhe kërkoi hetimin e tyre.
