Gjykata e Posaçme e Apelit për Korrupsionin dhe Krimin e Organizuar vendosi të mërkurën më 12 nëntor prishjen e vendimit të shkallës së parë për çështjen penale në ngarkim të ish-drejtuesit të Prokurorisë së Vlorës, Aurel Zarka, i akuzuar për korrupsion e ndikim të paligjshëm në çështjen “Toyota Auris”. Po ashtu, Apeli i Posaçëm ka vendosur kthimin e akteve në të njëjtën gjykatë dhe shqyrtimin e çështjes nga një tjetër kolegj.
Vendimi i Apelit të Posaçëm bazohet në nenet 428 dhe 429 të Kodit të Procedurës Penale, ku parashikohen shkelje të dispozitave ligjore. Aurel Zarka u deklarua fajtor dhe u dënua më 20 maj për korrupsion dhe ndikim të paligjshëm në çështjet penale që lidhen me dosjen e quajtur “Toyota Auris” të hetuar në Tiranë, si dhe në çështje të tjera penale të prokurorisë që ai drejtonte. Ndaj tij u caktua masa e dënimit me 4 vjet burg, që në aplikim të gjykimit të shkurtuar u reduktua me 2 vjet e 8 muaj heqje lirie. Po ashtu, u caktua edhe dënimi plotësues për heqjen e të drejtës për të ushtruar funksione publike për 5 vjet.
Dosja penale në ngarkim të Zarkës, ish-oficeres së policisë gjyqësore, Eriona Daupaj, avokatit Radovan Çela dhe biznesmenit Astrit Vladi, u dërgua për gjykim në fillim të muajit janar, ndërkohë që u nda çështja për të hetuar në vijim prokurorët, gjyqtarët apo funksionarët e tjerë të drejtësisë që dyshohet se lehtësuan akuzat për këto dosje. Hetimet ndaj Zarkës dhe të pandehurve të tjerë u nisën bazuar në të dhënat e administruara nga aplikacionet SKY ECC. Nga katër të pandehurit, fillimisht u ndalua vetëm prokurori Zarka dhe për ketë arsye gjykimi i tij u krye veçmas. Avokati Radovan Çela u vetëdorëzua disa muaj më parë, ndërsa dy të pandehurit e tjerë janë ende në arrati.
