Qindra banorë të Orikumit, Dukatit, Rradhimës dhe Tragjasit protestuan të hënën para Prokurorisë së Posaçme, ndërsa dorëzuan një padi dhe dosje të asaj që pretendojnë se është një përpjekje për t’i shpronësuar.
Padia e nënshkruar nga 180 banorë kërkon hetimin e qeverisë dhe zyrtarëve e ish-zyrtarëve të shumicës dhe opozitës me pretendimin se janë përfshirë në falsifikimin e dokumenteve të kthimit të pronave dhe një përpjekje për t’i dëbuar banorët e zonës nga tokat e tyre. Në padi janë po ashtu emra të disa kompanive të ndërtimit të përfshira me projekte në zonë dhe një numri personash po ashtu të lidhur me këto projekte.
Edviol Kulluri, një prej kallëzuesve me të cilin BIRN bisedoi, tha se ata ndjeheshin si para një pushtimi. Ai tha se prej vitesh banorëve nuk u njihej e drejta mbi pronat e trashëguara, ndërsa nuk u jepej as certifikatë për ato të fituara përmes ligjit 7501. Ai akuzoi se një grup politikanësh me pushtet në Tiranë po përdorin ish-pronarë për të marrë në zotërim prona sidomos në vijën bregdetare.
Avokati Arben Llangozi që përfaqëson banorët pretendon në kallëzim për një skemë të madhe manipulimi e krimi të organizuar. Ai ngre dyshime për një sërë veprash penale, por dokumenti i padisë përmend konkretisht vetëm pretendimet për një grup parcelash të përfituara përmes kthimit e kompensimit në vitin 2007. Padia pretendon se vendimi në fjalë është i falsifikuar. Për këto parcela që ndodhen kryesisht në Orikum dhe ku është ndërtuar që prej vitit 2009, ka pasur edhe më herët protesta të banorëve dhe akuza.
