“Sot ju më dhatë një përgjegjësi të madhe, një nder të jashtëzakonshëm, një detyrë që e pranoj me nder dhe me përkushtim të plotë”, tha Bedri Hamza pas zgjedhjes së tij të hënën si kryetar i ri i Partisë Demokratike të Kosovës, PDK, e cila ka qenë prej kohësh një nga forcat kryesore politike të vendit.
“Kosova ka nevojë për një vizion të qartë. Si kryetar i ri, premtoj se do ta hapim partinë tonë për secilin qytetar që dëshiron të kontribuojë. Do ta ndërtojmë frymën e bashkëpunimit”, shtoi Hamza.
Ish-kryetari i komunës së Mitrovicës së Jugut u zgjodh kryetar në një konventë partie pasi Memli Krasniqi dha dorëheqjen. Hamza ishte kandidati i vetëm për këtë post dhe fitoi mbështetjen unanime të delegatëve.
Krasniqi dha dorëheqjen vetëm disa ditë pasi Kosova mbajti zgjedhjet lokale, të cilat panë PDK-në të humbiste kontrollin e dy komunave, Mitrovica e Jugut dhe Drenasi, me këtë të fundit të konsideruar si një bastion tradicional i partisë.
“Unë besoj se PDK-së i duhet një momentum i ri, i cili do të krijojë mundësi të reja për mobilizimin e bazës sonë, por edhe që kandidati i partisë sonë për kryeministër të jetë udhëheqësi i saj”, u tha Krasniqi delegatëve të partisë, duke shtuar se ai la një parti “më të fortë se kur e gjeta”, kur u zgjodh kryetar në vitin 2021.
“Jo fillimi i një epoke të re”
PDK-ja doli nga radhët e larta të Ushtrisë Çlirimtare të Kosovës, UÇK, pas përfundimit të luftës së viteve 1998-1999 në Kosovë. Për vite me radhë, ajo u drejtua nga Hashim Thaçi, drejtuesi politik i UÇK-së gjatë kohës së luftës.
Fillimisht një parti e majtë, me status vëzhguesi në bllokun socialist evropian, ajo është zhvendosur drejt qendrës së djathtë.
Ajo mori pushtetin për herë të parë në vitin 2007 dhe mbikëqyri shpalljen e pavarësisë së Kosovës nga Serbia vitin pasardhës.
Kur Thaçi u bë president i Kosovës në vitin 2016, udhëheqja e partisë i kaloi Kadri Veselit, i cili më parë drejtonte Shërbimin e Inteligjencës së Kosovës, SHIK.
Pas 12 vitesh në pushtet, PDK-ja ra në vendin e tretë në zgjedhjet e vitit 2019 për sa i përket vendeve në parlament. Në zgjedhjet e shkurtit të këtij viti, ajo u ngjit përsëri në vendin e dytë me 24 deputetë në kuvendin me 120 vende.
Si Thaçi ashtu edhe Veseli janë aktualisht në gjyq për krime lufte në Hagë.
“Dorëheqja e Memli Krasniqit dhe zgjedhja e Bedri Hamzës është vetëm një kalim nga një kujdestar në një tjetër. Unë e shoh vetëm si një ndryshim teknik për të ruajtur unitetin brenda partisë”, tha për BIRN Xhavit Drenori, politolog.
“Nuk mendoj se është fillimi i një epoke të re. Besoj se kjo ishte një domosdoshmëri e kohës për shkak të rrethanave të krijuara pas zgjedhjeve lokale”, shtoi ai.
Drenori po i referohej plagëve të shkaktuara nga procesi i zgjedhjeve lokale, kur partia në Drenas ndryshoi kandidatin e saj për kryetar komune, duke hequr nga gara kryetarin aktual, Ramiz Lladrovcin.
Në shenjë hakmarrjeje, Lladrovci krijoi nismën e tij qytetare, e cila mposhti kandidatin e PDK-së në një goditje ndaj partisë që humbi kontrollin e një prej bastioneve të saj kryesore për herë të parë në vite.
“Ekzistonte rreziku që partia të përçahej, sepse një pjesë e atyre që janë të pakënaqur – kryesisht nga strukturat e vjetra të PDK-së me të cilët Lladrovci ka marrëdhënie të mira – kanë qenë duke menduar të krijojnë një listë kandidatësh për zgjedhjet e ardhshme parlamentare”, tha Drenori.
“Gara e pabarabartë” shkakton kritika
Para konventës së PDK-së, figura të larta të partisë kritikuan mënyrën se si u njoftua votimi për kryetarin e ri dhe mënyrën se si u zhvillua ai.
Gjatë njoftimit të dorëheqjes së tij, Krasniqi favorizoi hapur Hamzën si pasardhës të tij. “Nuk e fsheh preferencën time për Bedri Hamzën. Përkundrazi, e bëj publike me kënaqësi”, u tha Krasniqi gazetarëve më 12 nëntor.
Enver Hoxhaj, nënkryetar i PDK-së, e kritikoi menjëherë “garën e pabarabartë” për drejtimin e partisë.
“Për një vendim kaq të rëndësishëm, kërkoj që procesi të shtyhet në mënyrë që gara të jetë e hapur dhe njerëzit të kenë kohën e nevojshme për të shprehur vullnetin e tyre, të lirë nga presioni dhe imponimi”, tha ai.
“Dorëheqja e kryetarit, e shoqëruar me preferencën e tij për pasardhësin, krijon një perceptim të skemave të sajuara dhe paragjykuese, të cilat nuk e çojnë partinë përpara”, shtoi Hoxhaj.
Qemajl Mustafa, një ish-zyrtar i PDK-së që ka drejtuar komunën e Gjilanit gjatë dy mandateve, tha se preferenca e Krasniqit për Hamzën sugjeron se ata kishin rënë dakord “ta ndanin së bashku kënaqësinë e shtimit të vendeve të PDK-së … në zgjedhjet parlamentare të shkurtit, kur Hamza kandidoi për postin e kryeministrit, pavarësisht se Krasniqi ishte kryetari i partisë”.
“Nga pikëpamja demokratike, favorizimi i një kandidati nga kryetari në largim është e dëmshme, sepse dekurajon konkurrencën”, shtoi ai.
Në fjalimin e tij të fundit si kryetar, Krasniqi tregoi se ishte i vetëdijshëm se po i lë pasardhësit të tij një parti me plagë të dukshme, duke thënë se “pakënaqësitë dhe mllefet duhet të mbeten në të kaluarën”.
Ylli Hoxha, ekspert politik në Prishtinë, tha se PDK-ja ende po përballet me krizën e shkaktuar nga dërgimi i dy liderëve të saj historikë, Thaçit dhe Veselit, në Hagë.
“Është gabim të analizohet PDK-ja jashtë kontekstit të kësaj krize, sepse largimi i Thaçit dhe Veselit ishte një krizë më vete, me pasoja të rënda”, tha Hoxha për TV Dukagjinin të hënën.
“Ata shkuan në Hagë në një kohë kur partia e tyre tashmë ishte në krizë. PDK-ja kishte arritur rezultatet më të ulëta që nga themelimi i saj në vitin 1999 dhe lidershipi i ri i partisë e ka trashëguar këtë situatë”, shtoi ai.
Hoxha tha se emërimin e Hamzës e sheh si “përpjekje për të vazhduar menaxhimin e krizës” brenda partisë.
“Për sa kohë që Thaçi dhe Veseli janë në Hagë, lidershipi i PDK-së do të jetë vetëm menaxherial dhe do të mund ta çojë situatën vetëm deri në një pikë të caktuar. Nuk besoj se lidershipi i ri do të ketë karakter reformues”, tha Hoxha.
“Unanimiteti në konventë shpreh natyrën e krizës… PDK-ja e sheh veten në një krizë, të cilën synon ta kapërcejë dhe pret ta kapërcejë me kthimin e liderëve të saj nga Haga”, shtoi ai.
Xhavit Drenori tha se Hamza do të sjellë përvojën e freskët të kandidimit për kryeministër, të fituar në zgjedhjet e shkurtit.
Por Drenori nuk pret shumë sukses për Hamzën krahasuar me shkurtin, kur PDK-ja mori 21 për qind të votave dhe 24 vende në parlament.
“Nuk pres ndonjë ndryshim të madh, por mendoj se lajmi i mirë për PDK-në është se ata do të arrijnë të mbajnë vendin e dytë”, tha Drenori.
“PDK-ja ka parandaluar një përçarje të madhe, e cila mund të kishte ndryshuar ekuilibrin e pushtetit mes PDK-së dhe LDK-së. Por nuk mendoj se PDK-ja dhe LDK-ja do të arrijnë ta sfidojnë Vetëvendosjen për vendin e parë në zgjedhjet e ardhshme”, përfundoi ai.
