Prokuroria e Posaçme për Korrupsionin dhe Krimin e Organizuar deklaroi të enjten se kishte goditur një tjetër grup ndërkombëtar të trafikut të drogës në bashkëpunim me Prokurorinë Antimafia të Breshias në Itali dhe Prokurorinë Publike të Zvicrës.
Mes 24 masave të sigurisë të lëshuara nga drejtësia italiane, tre prej të dyshuarve janë arrestuar në Shqipëri, mes të cilëve edhe një oficer i Policisë Gjyqësore në Forcën e Posaçme Operacionale, i cili akuzohet se dekonspiroi hetimet tek anëtarët e grupit kriminal në këmbim të përfitimeve të parregullta financiare.
Grupi kriminal dyshohet se ka pasur qendrën në Shqipëri dhe ka krijuar degëzime në territorin e shtetit italian, ku ka dërguar lëndën narkotike të trafikuar nga Amerika e Jugut drejt vendeve të veriut të Evropës. Sipas njoftimit të SPAK, kokaina mbërrinte në portet e vendeve të Bashkimit Europian dhe transportohej drejt Italisë përmes rrugëve tokësore në automjete të tonazhit të rëndë.
Autoritetet ligjzbatuese italiane kanë sekuestruar gjatë hetimit të kësaj çështjeje rreth 1300 kg kokainë me destinacion gjashtë baza logjistike të krijuara nga grupi kriminal në të gjithë territorin italian. Nga hetimi është zbuluar se, prej këtyre bazave vijohej me shpërndarjen e lëndës narkotike si dhe me mbledhjen e parave në cash.
Shuma të konsiderueshme monetare të përfituara nga kjo veprimtari e paligjshme dyshohet se janë transferuar tek drejtuesit e grupit kriminal përmes shoferëve të autobusëve që vepronin në linjën Itali-Shqipëri, të ashtëquajtur dhe si “money mules”.
Gjatë operacionit të kryer të enjten në Itali u arrestuan 10 anëtarë të grupit si dhe u sekuestruan mbi 550 mijë euro në cash, 10 autovetura, 1 pistoletë gjysmëautomatike dhe 130 kg kokainë e heroinë, që vlerësohet se nëse do të shitej mund të arrinte vlerën e rreth 12 milionë eurove.
Po ashtu, gjatë hetimeve janë siguruar prova se oficeri i Policisë Gjyqësore pranë njësisë së Operacionales në Policinë e Shtetit, Igli Haxhiaj, i ngarkuar për kryerjen e veprimeve hetimore dhe procedurale për këtë çështje penale, u ka zbuluar personave të dyshuar që gjendeshin në Shqipëri të dhëna të akteve procedurale që përbënin sekret hetimor, duke sjellë si pasojë edhe arratisjen e tre prej të dyshuarve.
Haxhiaj akuzohet për veprat penale të shpërdorimit të detyrës, zbulimit të akteve sekrete dhe korrupsionit pasiv, ndërsa pas arrestimit, Policia e Shtetit deklaroi se kishte filluar procedurën e përjashtimit të tij nga radhët e uniformave blu.
Implikimi i punonjësve të policisë në aktivitete të krimit të organizuar është një problem shqetësues, i cili ka dalë në sipërfaqe gjatë hetimeve të bazuara në komunikimet e aplikacionit SKY ECC. Në më shumë se një rast, kreu i SPAK, Altin Dumani ka ngritur publikisht alarmin e korruptimit të zyrtarëve të policisë nga eksponentë të krimit të organizuar.
