Gjykata e Posaçme vendosi të martën të kalojë për gjykimin çështjen penale në ngarkim të ish-kreut të Autoritetit Rrugor Shqiptar, Evis Berberi dhe 21 të pandehurve të tjerë të akuzuar për korrupsion, shkelje të barazisë në tendera e pastrim parash.
Pas disa seancash paraprake, gjyqtari Bib Ndreca vendosi të martën të pranojë kërkimin e prokurorisë për dërgimin për gjykimin në themel me një trupë tjetër me tre gjyqtarë. Po ashtu, u dërguan kërkesat e 21 prej 22 të pandehurve për gjykim të shkurtuar, që të vlerësohen nga trupi gjykues që do caktohet. Gjykimi i shkurtuar është kërkuar nga të pandehurit Evis Berberi, Ervis Lami, Brunilda Buli, Gentian Gjyli, Genti Raça, Erald Elezi, Artan Leskoviku, Altin Marko, Orjon Islamaj, Adrian Kroi, Bledar Aliaj, Blerta Musabelli, Kamelia Tafaj, Adela Kica, Denis Xhoxhi, Ajda Stazimiri, Gëzim Noni, Shkëlqim Lusha, Ela Goxhaj, Jetmira Dervishi e Valbona Pepa. Sipas njoftimit të gjykatës, i pandehuri që nuk ka kërkuar gjykim të shkurtuar është Valter Begaj, pronari i shoqërisë së zotëruar nga Berberi, që është përdorur për marrjen e fondeve shtetërore.
Sipas SPAK, janë evidentuar fakte penale në shtatë procedura prokurimi, të zhvilluara në vitet 2020-2022, në Agjencinë për Eficencën e Energjisë dhe Autoritetin Rrugor Shqiptar, gjatë kohës kur titullar i autoritetit kontraktor ka qenë i pandehuri Evis Berberi. Ndërsa në një procedure prokurimi, i pandehuri Evis Berberi ka qenë kryetar i komisionit të vlerësimit të ofertave. Tetë procedura prokurorimi që janë hetuar nga SPAK rezulton që së bashku, të kenë pasur fonde me vlerë totale prej rreth 526 milionë lekëve.
Nga hetimi ka rezultuar se tenderat janë fituar nga kompania Net – Group sh.p.k., në zotërim të të pandehurit Valter Begajt dhe përfitimet monetare janë përfituar nga Berberi në mënyrë të tërthortë përmes shoqërisë DAAM sh.p.k., që dyshohet se kontrollohet prej tij.
Prokuroria konkludon se Evis Berberi është pronar de facto i shoqërisë DAAM sh.p.k. dhe për të fshehur gjurmët e pronësisë së kësaj shoqërie, në vitin 2019 e ka kaluar fiktivisht pronësinë tek të pandehurit Brunilda Buli, Valter Begaj dhe Ervis Lami.
Veç korrupsionit, në këto procedura tenderimi janë evidentuar fakte për veprën penale të shkeljes së barazisë së pjesëmarrësve në tendera apo ankande publike, në lidhje me veprimet e kundraligjshme të anëtarëve të komisionit të përllogaritjes së fondit limit, njësisë së prokurimit dhe komisionit të vlerësimit të ofertave. Këto veprime të paligjshme janë kryer në lidhje me përllogaritjen e fondit limit, hartimin e dokumenteve standarde të tenderit, si dhe për vlerësimin dhe shpalljen fitues të shoqërisë Net Group sh.p.k, në kundërshtim me kriteret e përcaktuara në dokumentet standarde të tenderit, duke e favorizuar atë në shtatë raste.
Në këto procedura prokurimi, Berberi akuzohet se ka vepruar në bashkëpunim me zyrtarët e tjerë, të pandehurit Gentjan Gjyli, Erald Elezi, Artan Leskoviku, Altin Marko, Bledar Aliaj, Blerta Musabelli, Kamelia Tafaj, Ela Goxhaj, Jetmira Dervishi, Orjon Islamaj, Adrian Kroi, Genti Raça, Adela Kica, Denis Xhoxhi, Gëzim Noni, Adja Strazimiri, Shkëlqim Lusha dhe Valbona Pepa.
Berberi është nën hetim nga SPAK edhe për çështje të tjera penale që kanë të bëjnë me abuzime të fondeve publike.
