Ngrirja e vizave të emigracionit për 75 vende nga Shtetet e Bashkuara ka shkaktuar një debat politik në Shqipëri, me opozitën që fajëson qeverinë e kryeministrit Edi Rama. Të enjten, ministrja e Jashtme, Elisa Spiropali hodhi poshtë pretendimet e opozitës se lëvizja e Shteteve të Bashkuara ishte një përgjigje ndaj politikave të Ramës.
“Vendimi i fundit i SHBA-ve nuk ka bllokuar lëvizjen dhe udhëtimin e qytetarëve shqiptarë në SHBA. Aspak. As vizat për qëllime turistike, studentore, biznesi, vizitat familjare apo udhëtimet e lidhura me punën,” tha Spiropali përmes një videoje.
Një ditë më parë, deputeti demokrat, Belind Këlliçi tha se vendimi e fuste Shqipërinë “në listë të zezë” dhe akuzoi kryeministrin Edi Rama se ishte përgjegjës për këtë.
“Vendimi i fundit për të pezulluar vizat nga Shtetet e Bashkuara, si masë mbrojtëse ndaj vendeve armike apo atyre që janë burim për emigracionin e paligjshëm, e vendos Shqipërinë në një tjetër listë të zezë, falë liderit të narkoshtetit të parë në Europë, Edi Rama,” tha Këlliçi të mërkurën.
Debati politik në Shqipëri lindi pasi Departamenti Amerikan i Shtetit deklaroi të mërkurën se do të ndalonte procesimin e vizave të emigracionit për 75 vende “emigratët e të cilëve përfitojnë nga sistemi social i shtetasve amerikanë në përmasa të papranueshme”.
“Ngrirja do të qëndrojë aktive derisa Shtetet e Bashkuara të sigurojnë se emigrantët e rinj nuk do të nxjerrin pasuri nga qytetarët amerikanë,” thuhet në deklaratë.
Më 4 janar, presidenti Donalt Trump puiblikoi një listë vendesh, emigrantët e të cilëve përfitojnë ndihmë sociale nga fondet publike amerikane. Lista tregonte se 41.3 për qind e emigrantëve nga Shqipëria përfitonin ndihmë sociale.
Lista e 75 vendeve të prekura nga ngrirja e vizave përfshinte gjithashtu Bosnje dhe Hercegovinën, Kosovën, Malin e Zi dhe Maqedoninë e Veriut.
Ambasa Amerikane në Tiranë tha se “Presidenti Trump e ka bërë të qartë se emigrantët duhet të vetë-mbështeten financiarisht dhe të mos u bëhen barrë amerikanëve”. Ambasada vuri në dukje se rregullat e reja nuk do të preknin aplikimet për viza turistike.
Zëdhënësi i Departamentit të Shtetit, Tommy Piggott tha në një deklaratë “Emigracioni nga këto 75 vende do të ndalet, ndërsa Departamenti i Shtetit po rivlerëson procedurat e përpunimit të tyre për të parandaluar hyrjen e shtetasve të huaj që mund të përfitojnë nga ndihma sociale dhe të mirat publike”.
Është e paqartë se sa do të zgjasë ky proces dhe kur do të përfundojë ngrirja e vizave.
