Në një takim zyrtar mbi Grupin e Punës për Kapitullin 24 – Drejtësia, Liria, Siguria – të organizuar në kuadër të Konventës Kombëtare për Integrimin Europian, mbështetur nga Bashkimi Europian, përfaqësues të Policisë së Shtetit, si edhe të European Movement Albania (EMA), diskutuan mbi rëndësinë kombëtare të mbrojtjes së fëmijëve në internet.
Drejtuesja pranë Sektorit për Hetimin e Krimeve Kompjuterike, Suela Bonjaku, pranoi se format e abuzimit ndaj fëmijëve janë rritur gjatë viteve të fundit.
“Spektri i formave të abuzimeve kibernetike shkon nga bullizmi deri te format më të rënda të abuzimit”, tha Suela Bonjaku gjatë fjalës së saj.
“Shantazhimi nëpërmjet materialeve intime është një nga format më të dhunshme të krimit kibernetik”, vijoi ajo, duke shtuar se që prej vitit 2023 në Policinë e Shtetit është krijuar një sektor i veçantë për hetimin e pornografisë në internet.
Me shtimin e rasteve të krimeve kibernetike, drafti i ri i Kodit Penal të Republikës së Shqipërisë ka përfshirë gjithashtu disa kategori të reja veprash penale për të mbushur hapësirat ligjore që deri më tani nuk përfshinin një sërë abuzimesh online.
Bonjaku shtoi se veprat penale të pornografisë kanë shënuar gjithashtu rritje.
“Në vitin 2025 Policia e Shtetit ka regjistruar 57 vepra penale në fushën e pornografisë, prej të cilave 32 janë zbuluar”, theksoi specialistja Bonjaku, duke shtuar se numri i këtyre krimeve ishte rritur krahasuar me vitin 2024.
Përfaqësuesit e Policisë së Shtetit pranuan rëndësinë e ndërtimit të kapaciteteve sa i përket hetimit të krimit kibernetik, si edhe shtimit të personelit.
“Me rritjen e raportimeve, ne kemi kërkuar edhe shtim të stafit”, pranoi Suela Bonjaku nga Sektori i Hetimit të Krimeve Kompjuterike.
“Kur interneti kthehet në rrjet manipulimi dhe dhune, kjo është një emergjencë kombëtare”, përfundoi ajo.
