Policia e Durrësit njoftoi të premten arrestimin e drejtorit të pezulluar të burgut të Durrësit, Indrit Cërloj, i akuzuar për “shpërdorim detyre” lidhur me arratisjen e Altin Ndocit nga Spitali Rajonal i Durrësit. Po ashtu, është ekzekutuar dhe vendimi tjetër i Gjykatës së Durrësit, për vendosjen e masës së sigurisë “arrest në shtëpi” ndaj doktoreshës së IEVP Durrës, 66 vjeçares Ylfete Sema, edhe kjo e akuzuar për “shpërdorim detyre”.
Në lidhje me ngjarjen janë ndaluar deri tani 9 persona, përfshirë drejtues dhe punonjës të sigurisë së burgut, të cilët akuzohen për shpërdorim detyre dhe shkelje të rregullores gjatë shoqërimit të Ndocit.
Drejtoria e Përgjithshme e Burgjeve njoftoi të mërkurën pezullimin e të gjithë zinxhirit komandues të burgut të Durrësit për t’i hapur rrugë hetimit. Veç drejtorit Indrit Cërloj dhe shefes së Shërbimit të Kujdesit Shëndetësor, u pezulluan edhe shefi i policisë Afrim Zeqiraj, shefi i komanduar i policisë për IEVP Durrës, Dezdemon Pazaj, kryeinfermieri Aulon Quku dhe 7 oficerë të policisë së burgjeve.
Pamjet nga kamerat e sigurisë të publikuara në media kanë zbardhur dinamikën e arratisjes, duke evidentuar në dukje shkelje të protokollit të sigurisë. Në pamjet filmike, Ndoci shihet duke zbritur nga ambulanca i lirë dhe pa pranga, pavarësisht se klasifikohet si person me rrezikshmëri të lartë.
Pamjet e Ndocit duke vrapuar po ashtu shihen në kamera. Policia dyshon se atë e priste një automjet tip “Audi A7”, me të cilin është larguar duke ndjekur itinerarin Spitallë – Shënavlash – Autostradë, me destinacion të dyshuar Tiranën.
Ndërkohë mësohet se forca të shumta policie kanë nisur kontrolle intensive në Tiranë, pas dyshimeve se i akuzuari për vrasje dhe pjesëmarrje në organizatë kriminale Altin Ndoci, i arratisur mesditën e djeshme, 13 janar, nga Spitali Rajonal i Durrësit, fshihet në Tiranë.
Altin Ndoci, i arrestuar që prej vitit 2020, është dërguar për gjykim nga SPAK si pjesë e organizatës kriminale të vëllezërve Çopja dhe akuzohet për disa vrasje, bazuar edhe në dëshmitë e të penduarve të drejtësisë.
