Prokuroria e Vlorës njoftoi të mërkurën më 21 janar sekuestrimin e pasurive të një personi të dënuar më parë për “Trafik të lëndëve narkotike” dhe “Organizatë kriminale”, si dhe të familjarëve të tij. Skuestrimi është kryer bazuar në hetimet e kryera ndaj tyre për veprën penale “Pastrimi i produkteve të veprës penale ose veprimtarisë kriminale”.
Në njoftim bëhet me dije se shtetasi A.Rr., i dënuar më parë për trafik droge, si dhe familjarët e tij nuk justifikonin me burime financiare të ligjshme pasuritë e krijuara.
Bazuar në rezultatet e hetimi, me kërkesë të prokurorisë, Gjykata e Vlorës ka vendosur sekuestrimin e tre apartamenteve, dy në Vlorë dhe një në Tiranë, me sipërfaqe totale rreth 208 m2; të një njësie në Vlorë me sipërfaqe 27 m2, si dhe tre automjeteve.
Sipas prokurorisë, nga ekspertimi i kryer, vlera totale e këtyre pasurive arrin në 400 mijë euro.
