Gjykata e Posaçme e Shkallës së Parë vendosi të mërkurën më 21 janar deklarimin fajtor të të pesë prej gjashtë të pandehurve për vrasjen e ish-oficerit të policisë Santiago Malko, ngjarje e ndodhur në gusht 2019 në rrugën “Xhanfize Keko” në Tiranë. Po ashtu, ata u dënuan edhe për grup të strukturar kriminal.
Leonard Duka, i njohur si kreu i grupit, u dënua me 30 vjet burg për këto akuza, ndërsa vëllai i tij, Erlis Duka u deklarua i pafajshëm. Katër të pandehurit e tjerë, Fatmir Hyseni (Musai), Aleksandër Maxhaku, Dritan Agaj dhe Oltjon Loga u dënuan me nga 25 vjet heqje lirie. Shqyrtimi i çështjes u krye me procedurën e gjykimit të zakonshëm.
Për vrasjen e Santiago Malkos janë dënuar më parë në një tjetër proces, Blendi Teta me 25 vjet burg dhe Ilir Selmani me 26 vjet.
Leonard Duka 39 vjeç, u ekstradua nga Belgjika në gusht të vitit 2024. Ai dyshohet si i përfshirë në konfliktet mes grupeve kriminale në Tiranë, në lidhje me atentatet ndaj Ervis Martinaj në bashkëpunim me Durim Bamin dhe Endrit Doklen. Ervis Martinaj u zhduk pa gjurmë në gusht 2022.
