Gjykata e Posaçme e Apelit për Korrupsionin dhe Krimin e Organizuar la në fuqi të enjten deklarimin fajtor për ish-drejtoren e institucionit ‘Tirana Parking’, Eglantina Zëre, dhe katër zyrtarë të tjerë të Bashkisë së Tiranës të akuzuar për “shkelje të barazisë në tendera”, por zbuti vendimin e shkallës së parë duke urdhëruar pezullimin e ekzekutimit të dënimit me burg.
Në vendimin e shpallur më 29 janar 2026, trupa gjykuese e përbërë nga Miliana Muça, Saida Dollani dhe Tereza Merkaj, konfirmoi se pesë zyrtarët e Bashkisë Tiranë kanë shkelur barazinë në tenderin për rikonstruksionin e sheshit të parkimit pranë stadiumit “Selman Stërmasi” në vitin 2019, duke favorizuar kompaninë që kontrollohej në hije nga ish-drejtorët Redi Molla dhe Mariglen Qato.
Megjithatë, ndryshe nga Shkalla e Parë që insistoi në vuajtjen e dënimit në qeli, Apeli aplikoi nenin 59 të Kodit Penal për të gjithë të pandehurit: Eglantina Zëre, Rivjola Baxha, Enkelejda Qyta, Bruno Koçi dhe Kristo Zhulati, duke i vënë ata në shërbim prove për një periudhë 12-mujore.
Çështja ndaj zyrtarëve të ‘Tirana Parking’ është një degëzim i dosjes voluminoze të njohur si “5D”, që përfshin disa prej ish-drejtuesve të Bashkisë së Tiranës. Sipas hetimeve të Prokurorisë së Posaçme, SPAK, procedurat e prokurimit në këtë institucion ishin thjesht një formalitet burokratik.
Në gjykatë u provua se vlerësimi i ofertave nuk ishte kryer nga anëtarët e Komisionit të Vlerësimit të Ofertave, por nga punonjës të shoqërisë private “5D Konstruksion”, e cila zotërohej de facto nga dy prej njerëzve më të fuqishëm të administratës së kryebashkiakut Erion Veliaj në atë kohë: ish-kreu i Ujësjellësit, Redi Molla, dhe ish-kreu i IMT-së, Mariglen Qato.
Sipas SPAK, Eglantina Zëre, në bashkëpunim me vartësit e saj, krijoi avantazhe të padrejta për kompaninë e lidhur me Mollën dhe Qaton. Në qershor të vitit 2025, Gjykata e Shkallës së Parë i kishte dënuar pesë zyrtarët me nga 9 muaj burgim (6 muaj me gjykim të shkurtuar), duke refuzuar kërkesën e tyre për liri. Por Apeli, ndonëse nuk preku masën e dënimit, vendosi ta pezullojë dënimin me burg dhe caktoi dënim me kusht për ta.
Ndalimi i ushtrimit të funksioneve publike për pesë vite për të dënuarit mbetet në fuqi.
