Prokuroria e Posaçme kundër Korrupsionit dhe Krimit të Organizuar, SPAK njoftoi të enjten më 29 janar përfundimin e hetimeve dhe dërgimin për gjykim të çështjes penale në ngarkim të ish-drejtuesit të Prokurorisë së Sarandës, Kledian Llaho, një ish-prokurori tjetër dhe dy biznesmenëve, të akuzuar për korrupsion pasiv dhe ndikim të paligjshëm.
Ish-prokurori Llaho dhe biznesmeni Vasil Bakalli akuzohen për veprat penale “Korrupsioni pasiv i gjyqtarit, prokurorit, apo funksionarëve të tjerë të sistemit të drejtësisë”, në bashkëpunim dhe “Ushtrim i ndikimit të paligjshëm ndaj funksionarëve publikë”, në bashkëpunim.
Ndërsa dy të pandehurit e tjerë, ish-drejtuesi i Prokurorisë Lushnjë, Çlirim Shahini që në kohën e kryerjes së veprës penale ka qenë avokat dhe biznesmeni Pando Papuçi akuzohen për “Ushtrim të ndikimit të paligjshëm ndaj funksionarëve publikë”.
SPAK bënë me dije se kallëzuesi, shtetasi M.A. është hetuar penalisht nga Prokurori Kledian Llaho, në kuadër të një hetimi penal të Prokurorisë së Sarandës, për veprën penale të shpërdorimit të detyrës. Nga verifikimet e kryera bazuar në pretendimet e kallëzuesit, SPAK vlerëson se është dokumentuar fakti penal se prokurori Kledian Llaho ka qenë i njëanshëm në hetimin që kishte kryer.
Në njoftim sqarohet se qëndrimi i Llahos lidhet me marrëdhënien që familja e kallëzuesit kishte me vjehrrin e tij. Kjo, pasi kallëzuesi kishte marrë me qira një hotel në pronësi të vjehrrit të Llahos. Kallëzuesi M.A. i kishte njohur një detyrim financiar prej 1.8 milionë lekësh vjehrrit të Llahos. Ndërkohë, ky i fundit, akuzohet se në cilësinë e prokurorit të një çështje penale në ngarkim të shtetasit M.A., i ka kërkuar që ti kthejë vjehrrit shumën 1.8 milionë lekë përmes shtetasit Vasil Bakalli, me qëllim lehtësimin e pozitës së tij procedurale.
Nga hetimi janë evidentuar edhe raste të tjera korrupsioni e ndikimi të paligjshëm. Biznesmeni Pando Papuçi, akuzohet se u ka dorëzuar në formën e ryshfetit të pandehurve Vasil Bakalli dhe Kledian Llaho, shumën prej 30 mijë eurosh, me qëllim që ata të ushtronin ndikim të paligjshëm tek një prokurore, që t’i lehtësoheshin pozitat në një hetim të filluar ndaj tij. Po ashtu, Pando Papuçi akuzohet se i ka dhënë 25 mijë euro avokatit të tij, Çlirim Shahini, i cili i ka premtuar se do të ushtronte ndikim të paligjshëm tek gjyqtarja e çështjes.
Ish-kreu i Prokurorisë së Sarandës, Kledian Llaho* i mohon akuzat dhe deklaroi përmes një njoftimi për shtyp se Prokuroria e Posaçme kishte marrë për bazë kallëzimin e një personi, i cili ishte hetuar prej tij dhe prokurorëve të tjerë për vepra penale të shpërdorimit të detyrës dhe korrupsionit.
Në reagimin e tij, Llaho i konsideron si tërësisht të pavërteta dhe të fabrikuara pretendimet e Prokurorisë së Posaçme se ai i kishte kërkuar apo marrë ryshfet me qëllim ushtrimin e ndikimit të paligjshëm te një prokurore tjetër.
“Kjo çështje nuk është drejtësi, por një farsë e ndërtuar mbi shkelje të rënda dhe manipulime të hapura. Dërgimi i çështjes në gjyq nuk e pastron hetimin nga shkeljet e rënda procedurale që e shoqërojnë,” tha ai, duke e konsideruar akuzën një hakmarrje të orkestruar.
Ish-drejtuesi i Prokurorisë së Sarandës, Kledian Llaho u shkarkua nga detyra prej Kolegjitt ë Posaçëm të Apelimit më 1 gusht të vitit të kaluar për probleme në kriterin e pasurisë dhe profesionalizmit, ndërsa Çlirim Shahini u shkarkua më 26 mars të vitit 2019 për deklarim të rremë, kontakte të papërshtatshme dhe në cënim të besimit të publikut te drejtësia.
*Shkrimi u amendua për të reflektuar qëndrimin e ish-prokurorit Kledian Llaho, i cili mbërriti në redaksi pas publikimit të tij.
