Komisioni i Posaçëm Parlamentar për Reformën Territoriale nuk do të funksionojë më si një komision bipartizan mes mazhorancës dhe opozitës, ku palët kanë të drejtë vetoje për ndryshimet ligjore, nëse kërkesa e depozituar të enjten në Konferencën e Kryetarëve do të miratohet në seancë plenare.
Socialistët pretendojnë me anë të kërkesës së tyre se komisioni është konstituuar formalisht, por nuk ka funksionuar që prej krijimit pasi anëtarët e opozitës janë bërë pengesë me bojkotin e tyre në mbledhje.
Kështu ata propozojnë që të ndryshohet formula e përbërjes, duke i dhënë PS-së mazhorancë vendimmarrëse që të vijojë punën dhe të marrë vendime edhe në mungesë të anëtarëve të opozitës.
“Nisur nga qasja e bojkotuese e opozitës parlamentare si dhe fakti që reforma administrative-territoriale përbën një nga prioritetet kyçe të programit të mazhorancës parlamentare Shqipëria 2030 dhe për integrimin në BE, propozohet ndryshimi i përbërjes dhe mënyrës së punës së Komisionit”- thuhet në shkresë e dorëzuar në emër të komisionit dhe firmosur nga 9 anëtarët socialistë të tij.
PS propozon që të shtohet një anëtar nga radhët e mazhorancës duke e ëuar numrin në 9 dhe nga opozita të jenë 8 anëtarë, 6 nga Partia Demokratke, 1 nga Grupi Parlamentar Aleanca për Ndryshim dhe 1 nga Partia e Lirisë dhe drejtimi I komisionit të jetë me një kryetar nga PS dhe një nënkryetar nga PD, duke prishtur formulën e bashkëkryesimit mes palëve dhe kësisoj duke hequr të drejtën e vetos në vendimmarrje të opozitës.
Sipas socialistëve këto ndryshime kërkohen për të zhbllokuar punën e komisionit që reforma e synuar të realizohet në afatin kohor prej 9 muajsh të parashikuar nga Kuvendi që reforma e re territoriale të jetë gati para zgjedhjeve vendore të 2027-ës.
Demokratët e kundërshtuan kërkesën e PS-së gjatë mbledhjes së Konferencës së Kryetarëve si prishtje e dialogut politik për reforma të kërkuara nga Bashkimi Europian dhe mohuan bojkotimin e punës.
“Ne ju themi se duhen procese konsensuale, hajdeni të gjejmë mekanizma dialogu, nën frymën e rekomandimeve të BE-së, ndërsa ju thoni jo”- argumentoi kryetari i grupit parlamentar demokrat Gazment Bardhi në mbledhje, sipas një njoftimi të shpërndarë nga PD.
Ai mohoi që anëtarët e PD-së të kishin bojkotuar punën e komisionit. “Në dy datat që ishin përcaktuar për zhvillimin e saj, anëtarët tanë nuk kanë qenë të pranishëm për shkak të angazhimeve të tjera të mëparshme. Kjo nuk përbën bojkot, por mungesë fizike për arsye objektive dhe të justifikuara”- tha ai.
Komisioni i Posaçëm për Reformën Territoriale synon të rimarrë në shqyrtim reformën territoriale të realizuar në vitin 2014 që shkriu komunat dhe krijoi 61 bashki të mëdha dhe 12 qarqe. Në komisionin e ri parashikohet shqyrtimi i kuadrit ligjor dhe institucional të qeverisjes vendore; opsione të reja për ridizenjimin territorial dhe forcimin e kapaciteteve administrative të njësive të qeverisjes vendore;analizë e sistemit të financave vendore, etj..
