Policia e Shtetit njoftoi të enjten se kishte ndaluar 37-vjeçarin Elio Laze, administrator i një portali online, për veprat penale të “shtrëngimit me anë të kanosjes ose dhunës për dhënien e pasurisë” dhe “mashtrimit”.
Sipas policisë, Laze akuzohet se shantazhoi një punonjës të administratës publike për t’i marrë 5000 euro në këmbim të fshirjes së disa artikujve që kishte postuar për të. Policia njoftoi gjithashtu se të dyshuarit iu gjetën me vete shuma prej 5 mijë eurosh dhe katër telefona celularë.
“Si rezultat i veprimeve të shpejta operacionale, u kap në zyrën e subjektit në Tiranë, menjëherë pasi mori 5000 euro nga i dëmtuari dhe u vu në pranga…Ai dyshohet se nëpërmjet shantazhit, i ka marrë punonjësit të administratës publike, shumën e eurove, për të fshirë nga portali që administronte disa shkrime që kishte postuar për të, në kohë të ndryshme,” thuhet në njoftim.
Burime nga Prokuroria e Tiranës i bënë me dije BIRN të enjten se kallëzuesi ka pretenduar se po shantazhohej prej një viti dhe se i janë kërkuar vlera monetare të ndryshme, në këmbim të fshirjes së shkrimeve të publikuara kundër tij. Në këto kushte, kallëzuesi i është drejtuar policisë që, pas kryerjes së veprimeve hetimore dhe simulimeve bëri të mundur kapjen në flagrancë të Lazajt, pasi kishte marrë shumën e parave që kishte kërkuar.
Sipas të dhënave në Qendrën Kombëtare të Biznesit, Laze rezulton të jetë ortak dhe administrator i “Illyridium Media”, subjekt me emrin tregtar “Priza.al”.
Të dhënat e bëra publike u konsideruan si veprime të rënda nga kreu i Asociacionit të Gazetarëve të Shqipërisë, Isa Myzyraj, që nëse provohen si të vërteta, nuk kanë sipas tij asnjë lidhje me gazetarinë dhe normat profesionale.
“Ka një ndarje të qartë mes gazetarisë si mision publik dhe çdo veprimtarie të paligjshme që mund të fshihet pas saj. Nëse provohet se kemi të bëjmë me shtrëngim për dhënie pasurie ose gjobë siç njihet gjerësisht, atëherë kjo nuk është gazetari investigative, nuk është presion publik në interes të qytetarëve, por është abuzim i rëndë me profesionin dhe me besimin e publikut,” tha Myzyraj.
“Asociacioni i Gazetarëve të Shqipërisë ka qenë dhe mbetet i palëkundur në mbrojtjen e gazetarëve kur ata sulmohen për shkak të detyrës, por po aq i qartë është qëndrimi ynë se askush nuk mund të fshihet pas kartës së gazetarit për të justifikuar veprime të paligjshme. Integriteti i profesionit është mbi çdo individ dhe është detyrimi ynë ta mbrojmë atë me seriozitet maksimal,” shtoi Myzyraj.
