Policia e Tiranës njoftoi të enjten sekuestrimin e mbi 10 mijë suplementeve ushqimore dhe bimore, që dyshohet se i përkasin “Monetize Ad d.o.o. Sarajevo Limited Charm”, një kompani e akuzuar se përdorte skema të marketingut mashtrues për të shitur produkte kontraverse mjekësore. Policia po ashtu njoftoi shpalljen në kërkim të Jasmin Trebo, 53 vjeç, një person nga Bosnjë-Hercegovina që shërben si administratori i kompanisë në Shqipëri.
“Nga kontrolli i ushtruar në ambientet e subjektit, specialistët e Seksionit për Hetimin e Krimeve Ekonomiko-Financiare gjetën dhe sekuestruan aty mbi 10 000 suplemente ushqimore dhe bimore të skaduara, pa pullën e Agjencisë së Barnave dhe pa atë të Ministrisë së Financave, si dhe pa etiketa në gjuhën shqipe”, thuhet në njoftimin për shtyp të Policisë së Tiranës.
Policia bëri me dije se gjatë operacionit që u kodua “Audienca” u përdorën metoda speciale hetimi nën drejtimin e Prokurorisë së Tiranës. “Në vijim të veprimeve procedurale për rastin, u shpall në kërkim administratori i subjektit, shtetasi nga Bosnja dhe Hercegovina, J. T., 53 vjeç, si dhe u proceduan penalisht punonjësit që ishin në ambientet e subjektit, shtetasit J. G., 30 vjeç dhe M. Ç., 26 vjeç”, thuhet në njoftimin e policisë.
Policia tha se ndaj personave të ndaluar dhe administratorit ishin ngritur akuza për “Kontrabandë me mallra të tjera”, “Ruajtja apo depozitimi i mallrave kontrabandë”, “Tregtimi dhe transportimi i mallrave që janë kontrabandë”, “Fshehja e të ardhurave” dhe “Importimi, prodhimi, shitja dhe ruajtja e ushqimeve të rrezikshme për shëndetin ose jetën e njerëzve”.
Një muaj më parë, një investigim i BIRN gjeti, përmes përdorimit të metodave kërkimore të hapura (OSINT), se kompania reklamonte në rrjetet sociale dhe internet një duzinë suplementesh “çudibërëse” – për shëndetin, potencën seksuale apo humbjen e peshës së tepërt. Investigimi gjeti se për ta bërë të besueshme reklamën, ajo përdorte intervista të trilluara me mjekë të njohur në vend. Kompania përdor të njëjtën skemë edhe në Kosovë dhe vende të tjera të rajonit.
BIRN po ashtu gjeti se ndaj personave të lidhur me kompaninë kishte kallëzime të mëparshme në Bosnjë dhe Hercegovinë për vepra penale të mashtrimit, keqinformimit të konsumatorëve dhe përdorimit të paautorizuar të të dhënave personale. Në Shqipëri prokuroria bëri me dije se kishte regjistruar një kallëzim penal në vitin 2025.
Të dhënat e Qendrës Kombëtare të Biznesit tregojnë se kjo kompani ka regjistruar degën në Shqipëri në qershor të vitit 2020, si subjekt me emrin: “Monetize Ad d.o.o. Sarajevo Limited Charm”. Fusha e veprimtarisë së saj përshkruhet si: “shërbime në marketingun e internetit dhe shpërndarjen e produkteve sipas modelit COD (cash on delivery)”.
Referuar të dhënave nga QKB-ja, përfaqësuesi i huaj ligjor i kësaj kompanie deri në qershor 2025 ishte Ajdin Brković dhe pas tij u emërua i shpalluri në kërkim Jasmin Trebo, të dy qytetarë boshnjakë. Të dhënat publike tregojnë se kompania kishte korrur sukses në vitet e fundit. Në vitin 2024, të ardhurat e saj ishin 140 milionë lekë, me një fitim prej 37 milionë lekësh.
