Pak ditë pasi kryeministri Edi Rama shpalli se Shqipëria renditej tashmë e 9-ta në botë për sigurinë kibernetike, grupi i hakerave të dyshuar, të lidhur me Iranin, njoftoi se kishte ndërhyrë në sistemet e Postës Shqiptare dhe po ashtu bëri publike emaile nga sistemi i postës.
“Sipas raportit, Shqipëria vlerësohet për progresin në forcimin e strukturave përgjegjëse për sigurinë kibernetike, zhvillimin e politikave dhe strategjive kombëtare, si dhe për përmirësimin e mekanizmave të koordinimit dhe reagimit ndaj kërcënimeve në hapësirën digjitale”, shkroi Rama në Facebook në 19 prill.
Pak kohë pas hakerimit të sistemeve të Kuvendit të Shqipërisë, grupi i njohur si Homeland Justice publikoi këtë të enjte se kishte nën kontroll faqen e Postës Shqiptare.
Në një format të njohur tashmë, faqet në Telegram publikuan të enjten në mëngjes të dhëna prej sulmit. “Është koha të ndëshkojmë sponsorët e krimit, Posta Shqiptare”, thuhet në mesazhin e parë, që u pasua me disa mesazhe më të gjata kundër Mujahedeen Al Mek që strehohen në Manëz dhe strukturave të shtetit shqiptar.
Menjëherë pas këtij mesazhi të parë u publikuan dosje me emaile të punonjësve të Postës Shqiptare.
Ndryshe nga emailet burokratike të shkëmbyera në emailet zyrtare të Kuvendit, emailet e rrjedhura nga sulmi ndaj postës përmbajnë të dhëna për dërgesa postare për individë dhe të dhëna të tjera të brendshme.
Megjithatë, Ministri i Shtetit për Qeverisjen Vendore, Ervin Demo, pretendoi para gazetarëve se shërbimet e postës nuk ishin cenuar dhe se të dhënat e vjedhura po analizoheshin.
“Në momentin që flasim po bëhet një analizë e detajuar nga AKSHI dhe jo vetëm. Shërbimet e postës po vijojnë normalisht, nuk ka të dhëna që janë inkriptuar, por duhet të presim përfundimin e analizave. Vetë AKSHI i ka kapacitetet që rrisin garancinë për integritetin e të dhënave publike në institucionet shqiptare”, tha Demo para gazetarëve.
Emailet e rrjedhura tregojnë ndërkohë se emailet zyrtare që përdor Posta Shqiptare kanë qenë nën sulm të paktën pesë herë gjatë vitit 2025. Në disa prej dosjeve të rrjedhura ka emaile paralajmëruese nga sistemi i sigurisë se punonjësve po u adresoheshin emaile me linqe të dëmshme që synonin phishing (një metodë për vjedhjen e fjalëkalimeve) të këtyre llogarive.
Ky është sulmi i dytë këtë muaj dhe i katërti në këto përmasa nga grupi që vetëidentifikohet si Homeland Justice. Ndryshe nga herët e tjera, në mesazhet e rrjedhura pas këtij sulmi grupi pretendon që janë nacionalistë shqiptarë që kundërshtojnë strehimin e Muxhahedinëve. Sulmi vjen në një kohë kur Irani vijon të jetë në konflikt të hapur me SHBA-të dhe Izraelin, pasi këto të dyja nisën një fushatë bombardimesh ndaj Teheranit në fund të shkurtit.
Ekspertë të intervistuar nga BIRN pas sulmit në sistemin e Kuvendit në fillim të këtij muaji, kanë ngritur dyshime mbi masat e supozuara të marra nga Shqipëria për të parandaluar suksesin e sulmeve dhe rrjedhjen e informacionit.
