Drejtuesi i Prokurorisë së Posaçme, Klodian Braho, paralajmëroi të hënën përpara Këshillit të Lartë të Prokurorisë, KLP se gjuha dhe retorika e ashpër politike rrezikon të kthehet në një katalizator për rritjen e agresivitetit të krimit të organizuar ndaj institucionit që do përceptohej si i pambrojtur.
Megjithatë Braho vuri në dukje se problemi kryesorë do ishin nismat ligjore për të kufizuar kompetencat apo penguar punën e institucionit. “Për të kuptuar se kur mund të jetë shqetësuese, ne kemi shënuar rastin se kur mund të shoqërohet me një situatë të ndryshimeve ligjore që cënojnë kompetencat e institucionit. Për momentin nuk ka një situatë të tillë”, tha Braho në përgjigje të pyetjes së anëtares së KLP-së Arta Mandro.
Prokurori tha se SPAK nuk do i tolerojë këto situata dhe se do të ngrejë zërin dhe do i bëjë publike ato.
Para një seance të shkurtër me pyetje përgjigje, në të cilën anëtarët e KLP-së përgëzuan SPAK për arritjet, Braho paraqiti të dhënat duke vënë në dukje një ndryshim të ndjeshëm në strategjinë hetimore dhe qasjen ndaj masave të sigurisë, një prej elementëve që u kthye në debat publik pas reagimeve të kryeministrit Edi Rama.
Braho tha kërkesat për masën e sigurisë “arrest me burg” u ulën me 53.4% krahasuar me vitin 2024, ndërsa vuri në dukje po përdoret “vetëm si mjeti i fundit”.
Gjatë vitit 2025, SPAK ka hetuar në total 870 procedime penale. Prokuroria ka ashpërsuar qasjen në mbledhjen e provave proaktive dhe përdorimin e teknikave speciale.
Braho riparaqiti raportin vjetor 2025, i depozituar më herët në Kuvend. Raporti jep një tablo të detajuar të situatës së kriminalitetit dhe thellimit të veprimtarisë së grupeve të strukturuara. Dokumenti thekson se krimi i organizuar është shtrirë gjerësisht dhe po bëhet gjithnjë e më i sofistikuar.
SPAK ka përqendruar burimet në goditjen e krimeve me rrezikshmëri të lartë, ku theksohen trafiku i narkotikëve, zbardhja e vrasjeve të organizuara, si dhe trafiku i armëve dhe kontrabanda e cigareve.
Sa i përket luftës kundër korrupsionit, viti 2025 ka shënuar një thellim të hetimeve ndaj zyrtarëve të lartë dhe goditjes së pastrimit të produkteve kriminale. Strategjia e re e SPAK është mbështetur fuqimisht tek Byroja Kombëtare e Hetimit,BKH.
Ndërkohë Braho evidentoi si domosdoshmëri “krijimin e Njësisë së Vlerësimit të Informacionit Kriminal në BKH, si strukturë e specializuar për mbështetjen e hetimeve komplekse, matjet e riskut dhe rritjen e rolit proaktiv në fillimin e çështjeve kryesisht”.
Braho ripërsëriti kërkesën për ndryshime ligjore për të ngritur kufirin financiar të korrupsionit të hetuar nga SPAK.
Pavarësisht rritjes së numrit të hetimeve proaktive, Drejtuesi i SPAK i paraqiti KLP-së një listë me sfida kritike që kërkojnë ndërhyrje. Ndër më shqetësueset mbetet pamundësia për të sjellë para drejtësisë eksponentë të krimit që fshihen jashtë vendit.
Po ashtu, ai kërkoi vëmendje institucionale për plotësimin e vakancave, zhvendosjen në ambientet e reja në verën e vitit 2026, si dhe zgjidhjen e ngërçit ligjor për statusin e prokurorëve të posaçëm pasi t’u përfundojë mandati.
Braho tha se prokurorët kishin nevojë për këshilltarë ligjorë për përballimin e punës, por tha se numri i prokurorëve ishte i mjaftueshëm për ngarkesën aktuale. Drejtuesi tha se ndryshimi i prokurorëve me mbarimin e mandatit 9-vjeçarë, mund të sjellë ngadalësim të hetimeve, por e cilësoi këtë si problem të përkohshëm.
