Një shtetas turk, i kërkuar ndërkombëtarisht për vepra të lidhura me terrorizmin, është ndaluar në aeroportin e Rinasit teksa tentonte të hynte në Shqipëri, njoftoi policia. Sipas autoriteteve, 67-vjeçari me inicialet I.K. u ndalua nga Njësia Rajonale Antiterrorizëm në Tiranë, në bashkëpunim me Policinë Kufitare dhe partnerët turq, pas verifikimeve në hyrje të territorit shqiptar.
Ai ishte shpallur në kërkim ndërkombëtar për “tentativë për rrëzim të rendit kushtetues” dhe “anëtarësim në organizatë të armatosur terroriste”, sipas legjislacionit penal turk. Ndalimi u krye në zbatim të një urdhri prokurori të vitit 2017 dhe një vendimi të Gjykatës së Tiranës për caktimin e masës së sigurisë “arrest në burg”, me qëllim ekstradimin e tij drejt Turqisë. Policia tha se ndalimi erdhi si rezultat i shkëmbimit të informacionit dhe rritjes së kontrolleve për parandalimin e hyrjes në vend të personave në kërkim ndërkombëtar.
Më 15 korrik 2016, një pjesë e ushtrisë turke tentoi të rrëzonte qeverinë e Recep Tayyip Erdogan, duke marrë kontrollin e disa pikave strategjike në Ankara dhe Stamboll, përfshirë ura, aeroporte dhe media shtetërore. Puçi dështoi brenda pak orësh, pas rezistencës së forcave besnike ndaj qeverisë dhe mobilizimit të qytetarëve që dolën në rrugë pas thirrjes së presidentit. Bilanci ishte i rëndë. Mbi 250 persona u vranë dhe mijëra të tjerë u plagosën, ndërsa parlamenti turk në Ankara u bombardua gjatë natës, duke shënjuar një nga momentet më simbolike të përplasjes.
Pas ngjarjes, autoritetet turke ndërmorën një fushatë të gjerë spastrimesh dhe arrestimesh, duke synuar rrjetet që i konsideruan përgjegjëse për tentativën, veçanërisht mbështetësit e klerikut Fethullah Gulen. Gjendja e jashtëzakonshme, e shpallur menjëherë pas puçit, u përdor për të justifikuar masa të forta ndaj administratës, sistemit të drejtësisë dhe medias, duke nxitur kritika nga organizatat ndërkombëtare për kufizimin e lirive dhe përqendrimin e pushtetit në duart e ekzekutivit.
