Gjykata e Lartë vendosi të enjten të zbusë masën e sigurimit personal ndaj ish-drejtoreshës së Agjencisë Kombëtare të Shoqërisë së Informacionit, Mirlinda Karçanaj, e akuzuar si pjesë e një grupi të struktuar kriminal të drejtuar nga Ergys Agasi dhe Ermal Beqiraj në manipulimin e tenderave të AKSHI.
Gjykata e Lartë ndryshoi masën e arrestit shtëpiak ndaj Karçanajt, duke e zëvendësuar atë me dy masa sigurie më të lehta, “ndalimi i daljes jashtë shtetit” dhe “detyrimi për t’u paraqitur në policinë gjyqësore”.
Vendimi ndaj Karçanajt u mor tre ditë pasi Kolegjet e Bashkuara të Gjykatës së Lartë ndryshuan praktikën unifikuese përsa i përket mënyrës së përcaktimit të masave të sigurimit personal, duke vlerësuar se deri më tani gjykatat nuk kanë analizuar në mënyrë të mjaftueshme alternativat ndaj “arrestit në burg”.
Me të njëjtat masa sigurimi si Karçanaj, po hetohet edhe ish-zëvendësja e saj, Hava Delibashi.
Ndërkohë, Gjykata e Lartë, la në fuqi masën e sigurimit “Ndalim i daljes jashtë shtetit”, ndaj zv.drejtorit për hetimit e krimit në Policinë e Tiranës, Erjon Ismaili dhe për të hetuarin Gëzim Hoxhaj.
Ndaj dy të proceduarve të tjerë, Andis Papa e Rogers Rryta është caktuar nga Struktura e Posaçme masa e po hetohen me masën e sigurimit personal, “Ndalimi për të dalë jashtë vendit”.
Të dyshuarit si drejtues të këtij grupi kriminal, Ergys Agasi dhe Ermal beqiraj janë të shpallur në kërkim, pasi ndaj tyre është caktuar masa “Arrest në burg”.
Sipas SPAK, të hetuarit kanë detyruar përfaqësues të kompanive pjesëmarrëse në tendera të heqin dorë nga ankimet për procedurat e caktuara të tenderimit, duke i hapur rrugën kompanive të paracaktuara, për të cilat shqyrtimi i ankimimit mund të sillte edhe ndryshimin e renditjes së listës së fituesve.
Agjencia Kombëtare e Shoqërisë së Informacionit, AKSHI, është një prej institucioneve më sensitive në vend, pasi menaxhon thuajse të gjithë sistemin e qeverisjes digjitale përmes E-Albania, përfshi dhe ministren me Inteligjencë Artificiale, ndërsa kryen rolin e ndërmjetësit mes qytetarëve dhe institucioneve të ndryshme në lëshimin e qindra dokumenteve.
Agjencia ka qenë herë pas herë nën kritika për mënyrën e menaxhimit dhe tenderat sekretë, të justifikuar me siguri kombëtare, por skema e hetuar nga SPAK zbulon se kjo agjenci dhe informacionet kritike që ajo përpunon iu vunë në dispozicion një grupi kriminal, i cili përdor ndër të tjera pengmarrjen e rivalëve për të siguruar tenderat dhe para publike. Ndërkohë që hetimet e SPAK zbulojnë një skemë abuzimi me paratë publike, po ashtu ngrenë pikëpyetje mbi cënimin e sigurisë kombëtare.
