Prokurori i SPAK, Adnan Xholi kërkoi të premten më 8 maj dënimin me burgim të përjetshëm të të pandehurit Plaurent Dervishajt, që akuzohet për atentatin e nëntorit të vitit 2019 ndaj ish-prokurorit Arjan Ndoja, aktualisht deputet i Partisë Demokratike, Aleksandër Lahos i njohur si “Rrumi”, një personazh i krimit të organizuar në zonën e Durrësit e Shijakut, dhe vrasjen e të ndjerit Andi Maloku. Për të bashkëpandehurin në këtë atentat me pasojë vdekje, Julian Meçaj, prokurori Xholi kërkoi deklarimin fajtor dhe dënimin e tij me 35 vjet heqje lirie.
Prokuroria e Posaçme akuzoi Plaurent Dervishajn se në bashkëpunim me Redjan Rrajën, Ariol Halilin, Julian Meçajn, Bledar Polovinën, Amar Shkëmbin (alias Dritan), Ramazan Rrajën, Endrit Sinanin, Genti Nderjakun, Bashkim Haxhijan dhe Julian Pjetrin, kryen atentatin ndaj ish-prokurorit Ndoja, Aleksandër Lahos dhe të ndjerit Andi Maloku.
Dervishaj dhe Meçaj u gjykuan veçmas të pandehurve të tjerë, një pjesë e të cilëve janë gjykuar më parë dhe janë gjetur fajtorë. Gjykata ka dënuar për këtë vrasje Redjan Rrajën me burg përjetë dhe Ariol Halilin me 35 vjet burg. Të dënuar janë dhe Ramazan Rraja, Genti Nderjaku, Bashkim Haxhia, Endrit Sinani dhe Julian Pjetri.
Në seancën e ardhshme mbrojtësit e të pandehurve do të paraqesin konkluzionet e tyre përfundimtare.
Në seancën e mëparshme dy javë më parë, avokati i Plaurent Derivshajt pretendoi se një prej viktimave në këtë procesi, Aleksandër Laho, ka tentuar i pari të vrasë klientin e tij, pasi këtij të fundit i ishte dhënë prokurorë nga të afërmit e gjyqtarit të vrarë, Skerdilajd Konomi, që t’I ndihmonte për të marrë pronat e tyre në Hamallaj të Durrësit.
Një hetim i Prokurorisë së Posaçme, ende i papërfunduar, tregon se si një grup i akuzuar për krim të organizuar, i drejtuar nga Aleksandër Laho, kontrollonte regjistrat e vjetër të pronave në arkivat e Kadastrave dhe i përdori ato për të marrë nën kontroll mijëra metra katrorë tokë në bregdetin e Durrësit dhe Tiranë – për t’i shitur më pas te të tretët.
