Gjykata e Posaçme e Apelit për Korrupsionin dhe Krimin e Organizuar vendosi të shtunën, më 9 maj, shuarjen e masës së sigurimit personal “arrest në burg” të caktuar ndaj ish-drejtuesit të Prokurorisë së Vlorës, Aurel Zarka, në korrik të vitit 2024, kur ai u arrestua për korrupsion dhe ndikim të paligjshëm në çështje penale që lidhen me dosjen e quajtur “Toyota Auris”, të hetuar në Tiranë, si dhe në çështje të tjera penale të prokurorisë që ai drejtonte.
Vendimi për lirimin e Zarkës u mor nga trupi gjykues i kryesuar nga gjyqtari Florjan Kalaja dhe me anëtarë gjyqtarët Engert Pëllumbi dhe Tereza Merkaj, me arsyetimin se koha e paraburgimit ishte e njëjtë me dënimin prej 2 vjetësh e 8 muajsh burgim të dhënë ndaj këtij të pandehuri nga Gjykata e Posaçme e Shkallës së Parë.
Dosja penale në ngarkim të Zarkës, ish-oficeres së policisë gjyqësore Eriona Daupaj, avokatit Radovan Çela dhe biznesmenit Astrit Vladi, u dërgua për gjykim në janar të vitit 2025. Ndërkohë, çështja u nda për të hetuar në vijim prokurorët, gjyqtarët apo funksionarët e tjerë të drejtësisë që dyshohet se lehtësuan akuzat për këto dosje.
Hetimet ndaj Zarkës dhe të pandehurve të tjerë u nisën bazuar në të dhënat e administruara nga aplikacionet SKY ECC. Nga katër të pandehurit, fillimisht u ndalua vetëm prokurori Zarka dhe, për këtë arsye, gjykimi i tij u krye veçmas.
Sipas prokurorisë, u provua fakti se katër të pandehurit, në bashkëpunim me njëri-tjetrin, në disa raste kanë ofruar dhe premtuar përfitime të parregullta për të ushtruar ndikim te funksionarë të drejtësisë.
Apeli e prishi vendimin e Shkallës së Parë dhe e ktheu çështjen për rigjykim, me arsyetimin se provat dhe rrethanat vërtetojnë se Zarka dhe tre të pandehurit e tjerë, dhe jo vetëm ata, kanë vepruar në kuadër të një grupi të strukturuar kriminal.
Por, pas ushtrimit të rekursit nga SPAK dhe Zarka, Gjykata e Lartë e prishi vendimin e Apelit dhe e dërgoi çështjen për rigjykim nga një tjetër trup gjykues i Apelit.
Sipas arsyetimit të vendimit të Gjykatës së Lartë, shqyrtimi i çështjes ndaj Zarkës me gjykim të shkurtuar pengonte mundësinë e ngritjes së një akuze të re ndaj tij.
