Gjykata e Posaçme vendosi të martën më 19 maj kthimin në SPAK për hetime të mëtejshme e më të thelluara për çështjen penale në ngarkim të gjyqtares së saj, Irena Gjoka, e kallëzuar për veprën penale të falsifikimit pas pretendimeve se ajo kishte fshehur në formularin e deklarimit të figurës, një dënim penal të dhënë nga drejtësia greke.
Edhe pse Prokuroria e Posaçme vërtetoi dënimin penal ndaj gjyqtares Irena Gjoka, më 23 mars iu drejtua gjykatës për pushimin e procedimit penal me argumentin se nuk është provuar që magjistratja ka qenë në dijeni të dënimit kur e ka kryer deklarimin për figurën – ndërkohë që e konsideroi veprën penale të parashkruar.
Gjyqtarja Marinela Osmani që shqyrtoi kërkesën e SPAK ka vlerësuar se hetimet e prokurorisë kanë qenë të paplota dhe vendosi të martën kthimin e akteve.
Sipas vendimit, SPAK duhet të vazhdojë hetimet dhe t’i thellojë ato në përputhje me pjesën arsyetuese të vendimit. Po ashtu, gjykata e urdhëron prokurorin e çështjes Bledar Maksuti që të kryejë veprimet e përcaktuara brenda gjashtë muajve, nga dita e njoftimit të vendimit të formës së prerë.
Sipas SPAK, dokumentacioni i përcjellë nga autoritetet greke të drejtësisë tregon se gjyqtarja Irena Gjoka, alias Shpata, alias Maneku është dënuar nga Gjykata e Shkallës së Parë Janinë me burgim dhe gjobë, i konvertuar në gjobë. Materialet e administruara tregojnë se Irena Gjoka ka qenë subjekt i procedurave administrative dhe gjyqësore në Greqi, pas dy episodeve në kufi, ku është konstatuar përdorimi i dokumenteve të parregullta dhe tentativa për hyrje me të dhëna të ndryshme identifikuese.
Si pasojë, ndaj saj janë marrë masa administrative, përfshirë dëbimin dhe ndalimin e hyrjes në zonën Schengen, të cilat janë kundërshtuar prej saj në gjykatat administrative greke.
SPAK bëri me dije dy muaj më parë, se gjykimi penal ndaj Gjokës në Greqi është zhvilluar në mungesë të saj, ndërsa njoftimi është realizuar sipas procedurave për persona me vendbanim të panjohur. Sipas prokurorisë, nuk rezulton të ketë dokumentacion që provon se Gjoka është njoftuar realisht për procesin dhe shpalljen e vendimit.
Një tjetër argument i përdorur nga SPAK për kërkesën për pushimin e çështjes penale është parashkrimi i veprës penale. Sipas organit të akuzës, nga analiza e akteve rezulton se, edhe nëse do të merrej e mirëqenë ekzistenca e këtij vendimi penal, ndjekja penale lidhur me këtë fakt rezulton e shuar për shkak të parashkrimit.
Prokuroria e Posaçme nisi hetimet për Gjokën pas një kallëzimi të bërë nga Adriana Kalaja. Paralelisht, Inspektori i Lartë i Drejtësisë, ILD ka filluar një hetimin disiplinor ndaj Gjokës, pasi Këshilli i Lartë Gjyqësor refuzoi të merrte një vendim ndaj saj.
