Gjykata e Posaçme vendosi të hënën më 25 maj kthimin për hetime të mëtejshme të çështjes penale ndaj ish-kryetarit të Komisionit të Prokurimeve Publike, KPP, Jonaid Myzyri dhe katër zyrtarëve të tjerë të marrë të pandehur për favorizim të një bashkimi operatorëeh gjatë procedurës së prokurimit të vitit 2020 për mirëmbajtjen e rrugës Rrëshen – Shpal, me fond limit rreth 219 milionë lekë.
Një muaj e gjysmë më parë, SPAK kërkoi në gjykatë pushimin e çështjes, me argumentin se në përfundim të hetimeve nuk provohej akuza e ngritur. Gjyqtari Paulin Çera nuk e pranoi kërkesën për pushim dhe urdhëroi të hënën kryerjen e një akt-ekspertimi për të vlerësuar se si janë kryer procedurat e tenderit. Gjyqtari Çera ka lënë afat prej 45 ditësh për të kryer ekspertimin.
Në qershor të vitit të kaluar, pas pesë vjet hetimesh, Myzyri dhe zyrtarët e tjerë u morën të pandehur për shkelje të barazisë në tendera. Hetimi filloi bazuar në dyshimet se Myzyri kishte diktuar veprimet e anëtarëve të tjerë të KPP në rastet e shqyrtimit të ankesave ndaj procedurave të prokurimit. Ai u pezullua nga deryra dhe iu caktua masa detyrim paraqitje. Por, në tetor të vitit të kaluar, gjykata e pranoi kerkesën e tij për heqjen e masës së pezullimit nga detyra.
Jonaid Myzyri e mori detyrën në vitin 2020. Komisioni i Prokurimeve Publike përbëhet nga 5 anëtare, nga të cilët një kryetar dhe një tjetër nënkryetar. Kryetari dhe anëtarët e KPP emërohen nga Kuvendi me propozim të Këshillit të Ministrave për një mandat 5-vjeçar, me të drejtë rizgjedhje vetëm një herë.
