Një grup protestuesish dhe aktivistësh dorëzuan të mërkurën më 1 korrik pranë ambjenteve të Prokurorisë së Posaçme, librin “The Albanian Files: Freedom and Architecture”, e autorit Anneke Abhelakh, duke cilësuar si dokumentin ose armën e krimit me të cilin kryeministri Edi Rama ka shkatërruar Shqipërinë.
“Në këtë libër gjenden 523 projekte të ndryshme, disa prej të cilave të ndërtuara tanimë, të tjera në ndërtim e sipër dhe një pjesë e tyre në plan për t’u ndërtuar. Në këtë libër gjenden dhe mund të lexohen disa prej problemeve më të mëdha të këtij vendi dhe të këtij modeli qeverisjeje. Në këtë libër del qartë se kryeministri Rama dhe qeveria e tij e kanë shmangur në çdo moment konsultimin publik, duke iu mbivendosur shoqërisë përmes fuqisë së pushtetit dhe përmes marrëdhënies me arkitektë të huaj, ndërtues, biznesmenë e oligarkë të cilët kishin interes në ndërtim”, deklaroi për mediat aktivistja Sidorela Vatnikaj, e cila e dorëzoi librin në SPAK.
Sipas saj, në këtë libër del qartë se ligji nr.21 i vitit 2024, “Për disa shtesa dhe ndryshime në ligjin nr.81/2017 ‘Për zonat e mbrojtura’”, është miratuar për shkak të projekteve të ndryshme, të cilat gjenden në këtë libër vite përpara se të ndryshojë ligji.
“Aty gjenden edhe projektet e Zvërnecit që kryeministri Rama tha që nuk ekzistojnë. Datojnë që në vitin 2022, edhe më përpara se ligji të ndryshohej. Pra, për ne ka të dhëna që ligji është ndryshuar me porosi, sepse projektet kanë ekzistuar përpara se ligji të ndryshohej”, deklaroi ajo dhe shtoi se bashkëngjitur librit kanë vendosur dhe një kallëzim penal adresuar kryeministrit Rama, eksponentëve të tjerë të Partisë Socialiste, arkitektëve dhe biznesmenëve për të cilët shkruhet në këtë libër.
Sipas aktivistëve dhe protestuesve, për shkak se kryeministri Edi Rama është dhe kryetari i Këshillit Kombëtar të Territorit dhe vendos në miratimin e gjithë këtyre projekteve, del qartë se ai ka konflikt interesi me arkitektët dhe biznesmenët e ftuar për të investuar, të cilët përmenden në libër.
Kryeministri Edi Rama i ka hedhur poshtë akuzat rreth librit, duke i cilësuar ato si “inkuizicion”.
Protestuesit përsëritën kërkesën për dorëheqjen e Ramës, duke e cilësuar të panegociueshme.
“Ne, qytetarë të Republikës së Shqipërisë dhe protestues prej më shumë se 31 ditësh në shesh, jemi sot këtu përpara institucionit të Prokurorisë së Posaçme për të sjellë provën që sipas nesh dëshmon disa prej shkeljeve më të rënda të bëra nga kryeministri i vendit Edi Rama”, tha ndër të tjera aktivistja Sidorela Vatnikaj.
Libri “The Albanian Files: Freedom and Architecture” që u botua në qershor të këtij viti, ka ngjallur debat të gjerë publik. Aktivistët e cilësojnë si një dosje të betonizimit të Shqipërisë, duke mos kursyer as zonat e mbrojtura si Divjaka dhe Zvërneci, si dhe se mjaft projekte janë miratuar pa transparencë publike, bazuar në marrëdhëniet personale të kryeministrit.
Një ndër projektet që gjendet në këtë libër për një kullë në qendër të kryeqytetit, Mali i Tiranës që është në fazën fillestare të ndërtimit, po realizohet nga kompania “Nova Construction”, 91% të aksioneve të së cilës zotërohen prej biznesmenit Ilir Shtufi, i akuzuar për pastrim parash e grup të strukturuar kriminal. Ai është një ndër të proceduarit e dosjes së quajtur “Aruba”, ku nga hetimi janë ngritur dyshime për planet e bëra nga anëtarë të krimit të organizuar, për pastrimin e parave të drogës në projektet e mëdha të ndërtimit të qeverisë “Rama”, në Tiranë dhe bregdet.
