Seanca e verifikimit të masës së sigurisë për 34 të arrestuar pas operacionit VOL-VO4, zgjati gati 10 orë, ndërsa gjykata vendosi arrest me burg për 24 nga të ndaluarit, tetë u lanë në arrest shtëpiak dhe dy gra në masë detyrim paraqitjeje. Avokatët mohuan akuzat dhe cilësuar arrestimet të paligjshme.
Seanca për verifikimin e masës së sigurisë së caktuar ndaj 44 personave në kuadër të operacionit VOL-VO4, të proceduar si anëtarë të një grupi të strukturuar kriminal të shtrirë në gjithë vendin të përfshirë në trafikun e narkotikëve dhe tjetërsimin e pronave zgjati gati 10 orë.
Në seancën maratonë ishin të pranishëm fizikisht 34 personat e arrestuar gjatë ditëve të fundit, ndërsa u bë vlerësim mase në mungesë për 10 të tjerë. Prokuroria paraqiti ndërkohë para gjykatës një pjesë të provave ndaj të akuzuarve, për trafik narkotikësh, tjetërsim pronash, korrupsion e të tjera, përfshi përgjime telefonike dhe kërkojë masa sigurie me burg për shumicën e tyre.
Avokatët e të arrestuarve thanë se arrestimi kishte qenë i paligjshëm dhe se prokuroria nuk kishte prove. Ata e cilësuan procesin absurd, ndërsa thanë se të mbrojturit i kishin thënë gjykatës se po bëheshin “kurban për integrimin e Shqipërisë në Bashkimin Europian”.
Në fund të seancës gjykata vendosi të linte në burg dy ish-deputetët e Partisë Socialiste dhe 22 të arrestuar të tjerë, ndërsa 8 persona u lanë me masë sigurimi “arrest shtëpie” dhe dy gra u lanë me masë “detyrim paraqitjeje”.
Të 34 personat u arrestuan të shtunën dhe të dielën në atë që policia dhe prokuroria e pagëzuan si operacioni “VOL-VO4”. Ndër të arrestuarit e operacionit ishin dy ish-deputetë të Partisë Socialiste. Ish-Drejtori i Përgjithshëm i Burgjeve Arben Çuko dhe ish-deputeti i Lezhës Arben Ndoka. Çuko akuzohet për trasferimin të paligjshëm të një të dënuari. Ndërkohë Ndoka sëbashku me 12 persona të tjerë të arrestuar dhe katër të shpallur në kërkim, një pjesë anëtarë të familjes së tij akuzohet për tjetërsim pronash.
Po ashtu policia e prokuroria njoftuan se kishte ndaluar 27 anëtarë të një organizate trafiku narkotikësh të drejtuar nga vëllezërit nga Avdyli nga Shijaku, të dënuar edhe më parë për vepra të rënda penale.
Kryeministri Edi Rama dhe Ministri i Brendshëm Fatmir Xhafa lavdëruan punën e policisë dhe prokurorisë pas operacionit. Rama shkroi në Tëitter se do ta bënte vendin “të pajetueshëm për kriminelët”, ndërsa shprehu keqardhje për arrestimin e ish-deputetit Arben Çuko.
Në krahun tjetër kreu i Partisë Demokratike Lulzim Basha tha se të arrestuarit ishin “peshq të vegjël që sërish do të lirohen, siç ka ndodhur më parë”. Basha akuzoi Ramën dhe prokurorinë se po manipulonin dosjen “hetimore të Vangjush Dakos”.
Masa e sigurisë
Në orën 09:00 të mëngjesit, gjyqtari Bib Ndreca çeli seancën ku nisi verifikimi i 34 të ndaluarve: Arben Çuko, Arben Ndoka, Hajri Seferi, Jasin Kala (alias Jasin Avdyli), Shkëlqim Avdyli, Astrit Avdyli(alias Sulejmani), Saimir Gjepali, Altin Avdyli, Jasin Avdyli, Fatos Llaftiu, Denis Llaftiu, Esat Mehmeti, Saimir Sulejmani, Elis Guri, Ilirjan Prifti, Petro Kuci (alias Abedin Kuçi), Ardit Gjyriqi, Elton Shehaj, Armand Spiro, Zef Lazri, Artur Balla, Gjevi Ndoka(alias Xhevair), Bledi Ndokaj, Paulin Simoni, Zef Lazri, Bledar Koçi, Lule Zeneli, Luigj Paloka, Kol Lleshi, Vlash Gazulli, Zef Ndoka, Vasil Nika, Genc Zeneli, Mimoza Ndoka dhe Marjeta Perskura.
Rreth orës 11:00 prokurorët e çështjes Vladimir Mara dhe Dritan Prençi kanë lexuar kërkesën e tyre duke kërkuar vlerësimin si të ligjshëm ndalimin e 34 personave të sipërcituar dhe lënien në fuqi të masës së së sigurisë “arrest në burg” për 30 prej tyre, “arrest shtëpie” për Luigj Palokën, Vlash Gazullin e Vasil Nikën për shkak të moshës së tyre dhe detyrim paraqitje për Mimoza Ndokën e cila është nënën e një foshnjeje disa muajshe.
Të gjithë mbrojtësit ligjor kanë kundërshtuar kërkesat e prokurorisë, duke i kërkuar gjykatës lirimin e klientëve të tyre për paligjshmëri të ndalimit si edhe mungesë të provave.
Gjatë zhvillimit të kësaj seance që zgjati rreth 10 orë, deri në orën 19:00 të mbrëmjes së të mërkurrës, një prej të ndaluarve, Vlash Gazulli 74 vjeç, shfaqi dobësi fizike.
Pasi gjyqtari Bib Ndreca u njoh edhe me pretendimet e mbrojtjes dhe të të ndaluarve, vendosi që të caktojë një tjetër masë sigurie, atë të arrestit shtëpiak për tetë prej të arrestuarve, konkretisht për: Bledi Ndoka, Lule Zeneli, Luigj Paloka, Kol Lleshi, Vlash Gazulli, Zef Ndoka, Vasil Nika dhe Genc Zeneli, të dyshuar për tjetërsim të tokës me anë të falsifikimit të dokumenteve. Gjithashtu, u zbut masa e sigurisë në detyrim paraqitje edhe Mimoza Ndoka dhe Marjeta Perskura, edhe këto të dyshuara për të njëjtat vepra penale.
Të gjithë të arrestuarit e tjerë përfshi dy ish-deputetët u lanë me masë sigurie arresti në burg. Prokuroria thotë se ka provuar përfshirjen e tyre në vepra të ndryshme penale, përfshi trafikun e narkotikëve, tjetërsimin e pronës, falsifikimin e dokumenteve e të ngjashme.
Pas përfundimit të seancës së masës së sigurisë, avokati mbrojtës të deputetëve Arben Çuko dhe Arben Ndoka, Maks Haxhia e cilësoi këtë process si të montuar nga prokuroria ose nga një organ tjetër poshtë prokurorisë. “Ajo që ishte më qesharakja, që na bind katërcipërisht se ky process është i montuar nga organi i prokurorisë, është prezantimi i vendimit nga ana e gjyqtarit të çështjes, i cili në mes të seancës deklaroi se nuk e kishte ditur që zonja Mimoza Ndoka ka qenë me fëmijë të vogël…, ndërkohë që, kur një gjyqtar e merr një proces e shqyrton atë në gjithë detajet”, tha Haxhia.
Ai tha edhe se ndër të arrestuarit ishin tre të moshuar që nuk mund të liheshin në burg për shkak të moshës. Haxhia po ashtu pretendoi se ish-deputetit socialist, Arben Çuko, nuk kishte pranuar transferimin e të burgosurit nga burgu i Burrelit në atë të Peqinit.
Avokati mbrojtës i familjes Avdyli nga qyteti i Shijakut, Baftjar Rusi, u shpreh se nuk ka asnjë provë të vetme që të ndaluarit të mbahen në burg dhe se gjithçka ishte e montuar. Ai e cilësoi si një “shoë” që mund t’i shërbejë më shumë politikës.
Nga ana e saj prokuroria thotë se arrestimet janë kryer pas një hetimi dy vjeçar. Prokurorisë Pranë Gjykatës së Shkallës së Parë për Krime të Rënda pas muaj të tërë përgjimesh zbuloi një grup kriminal që vepronte në fushën e trafikimit të narkotikëve në zonën e Shijakut, ndërsa u gjet një rrjet trafikantësh në gjithë vendin, nga Hasi në Delvinë e në disa shtete të Bashkimit Evropian.
Hetimet, që çuan në arrestimin e 27 pjesëtarëve të organizatës, sekuestrimin e një sasie narkotikësh, ndërsa zbuluan sipas prokurorisë se grupi i goditur pas operacionit VOL-VO4, ishte përfshirë në një sërë aferash korruptive, duke ushtruar ndikim te funskionarë të administratës.
“Gjatë gjithë hetimit rezultoi se pjesëtarët e këtij grupi kriminal, kryenin edhe vepra të tjera penale, si korrupsion në sektorët publikë të ndryshëm, hipotekë, polici, bashki, dhe institucione të tjera të administratës shtetërore, për të cilat po vazhdojnë hetimet në vijimësi”, tha të hënën gjatë një konference për shtyp drejtuesja e Prokurorisë së Krimeve të Rënda Donika Prela.
Mes të arrestuarve ishin edhe dy ish-deputetë të Partisë Socialiste. Ish-deputeti i PS Arben Ndoka “dyshohet për veprat penale “Falsifikimi i dokumenteve”, Falsifikimi i vulave, stampave ose i formularëve”, “Shpërdorimi i tokës”, në kuadër të një grupi kriminal, të përfshirë në tjetërsim tokash”.
Ndërsa Arben Çuko i cili deri një muaj më parë ishte Drejtor i Përgjithshëm i Burgjeve u arrestua për “korrupsion pasiv”, ndërsa kishte bërë trasferimin e një të dënuari.