Në zgjedhjet e 25 qershorit 2017, Partia Socialiste arriti të marrë 73 mijë vota, mbi 12 mijë më shumë se sa në vitin 2013, duke marrë 8 nga 14 mandatet e këtij qarku dhe duke siguruar një nga fitoret më të thella në historinë e zgjedhjeve.
Partia Socialiste dhe Lëvizja Socialiste për Integrim njohën një rritje të fuqishme në numrin e votave të fituara në Qarkun e Durrësit, ku përfshihen bashkitë Durrës, Shijak, e Krujë, bashki, kontrolli i të cilave ndahet mes PS dhe LSI, ndërkohë që Partia Demokratike mori rreth 9,500 vota më pak duke shënuar rezultatin më të keq në shumë kohë.
Zgjedhjet në Durrës kanë ofruar gjithmonë surpriza përgjatë 20 viteve të fundit. Në vitin 2005, fitoret në zgjedhjet maxhoritare në këtë qark qenë një faktor i rëndësishëm në fitoren e zgjedhjeve nga demokratët në rang kombëtar. Në vitin 2009, Partia Demokratike arriti të marrë 10 mijë vota më shumë se sa socialistët ndërsa në zgjedhjet e vitit 2013, rezultati u përmbyt në favor të socialistëve, të cilët fituan rreth 8 mijë vota më shumë se sa demokratët. Por në zgjedhjet e vitit 2017, socialistët arritën të marrin mbi 30 mijë vota më shumë se kundërshtarët e tyre.
Socialistët arritën të marrin më 2017 më shumë vota nga sa kishin marrë më 2013 falë performancës më të mirë si në Krujë ashtu edhe në Durrës ndërsa fitoren më të thellë e realizuan në Shijak.
Lista e socialistëve për deputetë në Durrës kryesohej nga Eglantina Gjermeni, [CV Link] ish-aktiviste e shoqërisë civile, e cila hyri në politikë për herë të parë në vitin 2009 ndërsa gjatë katër viteve të fundit ka qenë Ministre e Zhvillimit Urban.
Ministrja e Zhvillimit Ekonomik, Turizmit, Tregtisë dhe Sipërmarrjes, Milva Ekonomi, me profesion statisticiene, qe e dyta në listë. [CV Link].
Fidel Ylli, i arsimuar në Institutin e Kulturës Fizike dhe biznesmen, [CV link], u zgjodh i treti në listën e socialistëve.
Ilir Ndraxhi, biznesmen nga Shijaku, hyn në parlament si i katërti në listën e socialistëve. [CV link]
Rolant Xhelilaj, ekonomist, i cili së fundmi qe Prefekt i Qarkut Durrës, u zgjodh deputet si i pesti. [CV Link]
Jurgis Çyrbja [Link CV], 32 vjeç, ka punuar që nga viti 2013 si drejtor i Zyrës së Regjistrimit të Pasurive të Patundëshme në Durrës. Ai banon në Shijak dhe ende pa marrë mandatin është bërë emër i debatuar për shkak se rezulton dëshmitar në gjyqin kundër Emiljano Shullazit.
Rrahman Rraja, [CV Link] ish-nënkryetar i Bashkisë Krujë dhe ish-kryetar i komunës Nikël u zgjodh i shtati nga lista e socialistëve.
Klodiana Spahiu, [CV Link] deputete që nga viti 2009, është e fundit në listën e socialistëve.
Oerd Bylykbashi, [CV Link] jurist, ish-drejtor në kryeministri në kohën e Berishës dhe deputet që nga viti 2013, qe i pari në listën e Partisë Demokratike për Durrësin.
Fatbardha Kadiu, e cila në CV-në e saj shkruan vetëm që është Prof.Asoc. Doktor Shkencas, qe e dyta në listën e PD. Ajo qe edhe kandidatja e vetme femër në listën e PD për këtë qark.
Edi Paloka, [CV Link] i diplomuar në Inxhinieri Gjeofizike dhe që ka qenë deputet që nga viti 2001, qe i treti në listën e PD.
Florjon Mima, [CV Link] ekonomist, ish-zëvendë-ministër financash dhe ministër për Partinë Demokratike, është i katërti dhe i fundit nga deputetët e PD në Durrës.
Lefter Koka, [CV Link] aktualisht ministër i Mjedisit, u zgjodh i pari në listën e Lëvizjes Socialiste për Integrim.
Nora Malaj, [CV Link] aktualisht zëvendësministre e Arsimit, qe e dyta për LSI.
