Nëntë ish ministra janë duke u hetuar për dyshimet për korrupsion për softet kompjuterike të shkollave.
Prokurorët nga Departamenti Kombëtar anti-korrupsion, DNA, synojnë të fillojnë hetim penal mbi nëntë ish ministra të dyshuar për pastrim parash, abuzim me pushtetin dhe ryshfet në një rast që përfshin pagesat për licencat e Microsoft IT për shkollat publike.
Prokurorët besojnë se ka patur korrupsion në kontratën me vlerë 105 milionë dollarë, e cila i jepte licenca të Microsoft Office për shkollat dhe institucionet e tjera publike mes viteve 2004 dhe 2009.
Njoftimi për shtyp i DNA thotë se besonte se zyrtarët kanë përfituar për vete uljen prej 47 për qind që Microsoft i pati ofruar qeverisë së Rumanisë.
Njoftimi thotë se ministrat në fjalë kërkuan ryshfet për të favorizuar Fujitsu Siemens Computers në menaxhimin e kontratës, përkundrejt një çmimi 40 për qind më të shtrenjtë.
Hetimi ka zbuluar se nga të 54 milionë dollarët që qeveria pagoi në bazë të kontratës së licencave dhe zgjatjeve të kësaj kontrate, komisione të paguara për zyrtarët publikë arritën në 20 milionë dollarë.
DNA ka kërkuar parlamentin dhe presidentin të lejojë fillimin e hetimeve mbi tri ish ministra arsimi, katër ish ministra të teknologjisë së informacionit, një ish ministër financash dhe një ish sekretar qeverie. Sipas ligjit, deputetët dhe senatorët nuk mund të vihen nën akuzë për sa kohë parlamenti nuk ka hequr imunitetet e tyre.
Hetimi filloi pas denoncimit të bërë në maj nga një njësi kontrolli e qeverisë, e cila njoftoi prokurorët për dyshime për parregullsi në kontratë. Ish qeveria e miratoi kontratën.
Rumania konsiderohet ende si një nga shtetet më të korruptuara në Bashkimin Europian dhe ka bërë progres të kufizuar në luftën kundër korrupsionit dhe krimit të organizuar që kur hyri në Bashkimin Europian në vitin 2007.
Por gjatë viteve të fundit një numër zyrtarësh të lartë janë dënuar për korrupsion.
