Një çështje tjetër kundër zëvendës-presidentit të dhomës së ulët të parlamentit të Rumanisë, që dha dorëheqjen, përfshin edhe vjehrrin e Kryeministrit Victor Ponta.
Viorel Hrebenciuc, një figurë kyçe në drejtimin e Partisë Social Demokrate, PSD, ka lajmëruar të martën se ai po dorëhiqej nga parlamenti, një ditë pasi hetuesit hapën çështje për korrupsion dhe përdorim të influencës.
“Dua të jem i gatshëm për hetim të mëtejshëm… por nuk do të jap dorëheqjen nga PSD dhe jam i sigurt se do të kthehem në parlament në zgjedhjet e ardhshme të vitit 2016” tha Hrebenciuc.
Prokurorët anti-korrupsion lajmëruan të hënën se kishin nisur një hetim penal ndaj Hrebenciuc dhe një lideri tjetër të njohur të PSD, senatorit Dan Sova, për bashkëpunim në bërjen e një ligji amnistie dhe falje në çështjet kriminale që i jepnin përfitime materiale politikanëve.
Hrebenciuc mendohet se ka premtuar të mbështesë Sovan si liderin e ardhshëm të partisë nëse presidenti aktual i PSD, Kryeministri Victor Ponta, do të zgjidhet, siç pritet, president i Rumanisë muajin e ardhshëm.
Përdorimi i influencës është një krim sipas ligjit rumun, që mund të dënojë deri në shtatë vite burg.
Hrebenciuc tha se diskutimet e tij me Sovan ishin thjesht “diskutime normale mes dy politikanëve dhe kolegëve” dhe nuk përbënin asnjë shkelje.
Prokurorët po hetojnë tashmë një tjetër çështje ku përfshihet Hrebenciuc, lidhur me ri-privatizimin e pyjeve të zaptuara nga regjimi komunist.
Çështja përfshin edhe Ilie Sarbu, një senator dhe njëkohësisht vjehërr i Kryeministrit Victor Ponta. Ata akuzohen për dhënien e ndihmës në organizimin e kalimit të paligjshëm të 43.000 hektarëve të pyllit te palët e treta në vitin 2012.
Ponta nuk është akuzuar për përfshirje në asnjë nga çështjet.
Analistët thonë se është e paqartë nëse akuzat e korrupsionit do të dëmtojnë shanset e Pontas në zgjedhjet e ardhshme.
Një anketim i javës së shkuar tha se ai do ta fitonte me shumë gjasa garën me rreth 40 për qind të votave në raundin e parë më 2 nëntor dhe një shumicë të drejtpërdrejtë në balotazh.
