Planet e qeverisë rumune për të zhvilluar industrinë e turizmit duke ulur TVSH-në janë përshëndetur nga operatorët.
Një ulje prej 15 për qind në taksën e shitjes të vënë mbi shërbimet turistike është mirëpritur nga industria rumune e turizmit.
“Kjo do t’i ulë përqindjet e hotelit deri në 10 për qind,” tha Alin Bureca, menaxher i agjencisë turistike me bazë në Bukuresht.
“Kjo është masa e parë e vërtetë e ndërmarrë në mbështetje të industrisë së turizmit vendas në këto gjashtë vitet e fundit. Për këtë arsye presim që shitjet të rriten në vitin 2015,” shtoi ai.
Kryeministri Victor Ponta lajmëroi të hënën se TVSH-ja e shërbimeve turistike do të ulet nga 24 në 9 për qind, përfshirë çmimet e dhomave, vaktet në hotel dhe shërbime të tjera.
Ponta shtoi se ndikimi buxhetor i kësaj lëvizje do të kushtojë vetëm 22 milionë euro dhe do të llogaritet në projektbuxhetin e vitit të ardhshëm.
Për momentin, TVSH-ja është 9 për qind vetëm për paketat që përfshijnë akomodim dhe mëngjesin. Pronarët e hoteleve kanë kërkuar prej kohësh që të ketë ulje edhe në paketat e tjera.
Rumunët e përfshirë në industri, por edhe të tjerë e përshëndetën këtë lajm por thanë se duhet të bëhet edhe më shumë për të zhvilluar turizmin.
“Ulja e TVSH-së do të rrisë numrin e njerëzve që i drejtohen destinacioneve turistike rumune. Por ka ende shumë gjëra për të bërë, përfshirë infrastrukturën dhe përmirësimin e shërbimeve,” shkruan një koment në Gandul.info, një portal online lajmesh.
Studimet tregojnë se rumunët preferojnë të udhëtojnë jashtë shteti për udhëtime.
Në vitet e fundit, Ministria e Turizmit ka promovuar udhëtimin drejt Rumanisë nëpërmjet reklamave në CNN, Euronews dhe Eurosport.
Vitin e shkuar, turistët e huaj të marrë së bashku, kaluan rreth 3.4 milionë net në Rumani, krahasuar me 12 milionë në Hungari dhe 14.3 milionë në Bullgari.
