Të paktën 14 imigrantë, që besohet të ishin nga Lindja e Mesme, vdiqën të enjten në mbrëmje në Maqedoninë qendrore kur një tren goditi kolonën e tyre teksa udhëtonin një rrugë shumë të rrahur nga imigrantët.
Policia maqedonase tha se 14 imigrantë u vranë të enjten mbrëma në hekurudhën që kalon në qytetin Veles të Maqedonisë qendrore për në kryeqytetin Shkup.
Autoritetet thanë se ekzistonte frika se totali i vdekjeve mund të ishte më i lartë.
Sipas raporteve paraprake, rreth 50 refugjatë nga shtetet e Lindjes së Mesme ishin në linjën hekurudhore kur erdhi treni. Për shkak të errësirës dhe hapësirës së ngushtë të linjës, jo të gjithë ia dolën t’ia mbathin nga treni në lëvizje.
Zona e aksidentit është e paaksesueshme nga media, sipas policisë për shkak të terrenit të vështirë ku linja hekurudhore kryqëzohet me grykat e pjerrëta dhe luginat e lumenjve, për këtë arsye skuadrat e kërkimit e kanë pasur të vështirë të depërtojnë.
Policia thotë se identitetet dhe kombësitë e 14 viktimave janë ende të panjohura.
Tetë të mbijetuar, që besohet se janë të afërm të të vdekurve janë marrë në kujdes në zonën e aksidentit. Pjesa tjetër besohet se janë shpërndarë.
Linja hekurudhore që kalon qytetin kodrinor të Veles është bërë e njohur për aksidentet e trenit që përfshijnë refugjatë nga shtete si Siria, Iraku dhe Afganistani, të cilët udhëtojnë përgjatë saj në këmbë, duke rrezikuar jetën ndërsa kalojnë në terrenin e vështirë, shpesh në mes të natës.
Synimi i refugjatëve, sipas një investigimi të BIRN është të përdorë hekurudhën, që është pjesë e korridorit 10 pan-europian të Maqedonisë për të arritur Serbinë dhe për të hyrë më pas në Bashkimin Europian.
Pavarësisht se linja ka marrë dhjetëra jetë njerëzish, ngjarja e së enjtes është deri më tani tragjedia më e keqe.
Lexoni reportazhin: Refugjatët luajnë me jetën gjatë kalimit transit në Maqedoni
