Presidenti Klaus Iohannis i ka kërkuar kryeministrit rumun të japë dorëheqjen pasi kundër tij janë ngritur akuza për korrupsion.
Presidenti Klaus Iohannis të premten tha se kryeministri Victor Ponta duhet të japë dorëheqjen pasi prokurorët startuan një hetim kriminal anti-korrupsion për çështjet e tij.
“Teksa kryeministri po akuzohet për korrupsion, kjo është një situatë e vështirë për Rumaninë. Gjëja më e keqe që mund të ndodhë tani në Rumani është një krizë politike. Në një kontekst të tillë, e nxis kryeministrin Ponta të japë dorëheqjen,” tha Iohannis.
Ponta nuk pranoi t’i bindej kërkesës duke thënë në Facebook se ai e respektonte mendimin e presidentit, por sipas tij ishte caktuar me detyrë nga parlamenti dhe vetëm ky mund ta shkarkonte”.
Drejtoria Kombëtare Anti-Korrupsion, DNA, të premten lajmëroi procedimin kundër Pontës për 17 akuza ndër to për falsifikim, evazion fiskal, pastrim parash dhe konflikte interesi.
Akuzat lidhen me aktivitetin e mëparshëm të Pontës si avokat në një firmë ligjore të zotëruar nga një ish-ministër, Dan Sova, një mik i afërt i tij.
Prokurorët pretendojnë se Ponta mori rreth 40 mijë euro nga firma ligjoe Sova nga viti 2007 dhe 2008 edhe pse ai nuk punoi për firmën. Ata thonë se firma sajoi raporte aktiviteti për punën e supozuar të Pontës.
Hetuesit thonë se Ponta përdori paratë që mori për të blerë dy apartamente në Bukuresht. Në vitin 2009, ai mori një makinë luksoze nga firma ligjore Sova, pa e paguar.
Drejtoria Anti-korrupsion e akuzoi Pontën për konflikt interesi si kryeministër, sepse ai e bëri Sovan një ministër në 2012, kur më parë kishte qenë në listën e pagesave të tij.
Opozita të premten ngriti një mocion mosbesimi kundër qeverisë.
Sova që herët këtë vit u dorëhoq si ministër transporti, është në hetim për abuzim me pushtetin përfshirë kontratat e nënshkruara nga 2007 dhe 2009 mes firmës së tij ligjore dhe dy firmave energjetike në vend.
Prokurorët thonë se ai falsifikoi dokumente për të provuar pafajësinë e tij dhe gjithashtu se shkatërroi korrespondencën mes tij dhe menaxhimit të kompanive. Sova mohon ta ketë bërë këtë.
Të martën deputetët votuan kundër arrestimit të Sovas. Vendimi u kritikua ashpër nga presidenti Iohannis.
