Presidenti i parë post-komunist i Rumanisë përballet me akuzën për krime kundër njerëzimit për shkak të shtypjes me dhunë të protestave në vitin 1990, gjë që solli disa të vdekur.
Një gjykatë në Rumani deklaroi të mërkurën se ish-presidenti Ion Iliescu është marrë i pandehur i dyshuar për krime kundër njerëzimit në lidhje me shtypjen e një proteste në vitet 1990.
Iluescu akuzohet se qe i përfshirë në shtypjen me dhunë të një proteste të opozitës në Bukuresht, protestë që vijoi për disa javë në mes të vitit 1990.
Gjykata tha se Iliescu qe vënë nën akuzë në lidhje me vdekjen e tri protestuesve dhe plagosjen e katër të tjerëve. Iliescu refuzoi t’i përgjigjet pyetjeve të gazetarëve ndërsa doli nga zyra e prokurorëve. Ai ka mohuar më herët përgjegjësinë.
Virgil Magureanu, në atë kohë drejtues i shërbimeve sekrete rumune është hetuar më herët mbi rolin e tij në incidente.
Në qershor 1990, mijëra minatorë qymyri u bashkuan me policinë dhe sulmuan protestuesit kundër qeverisë në Bukuresht duke rrahur mijëra njerëz. Katër njerëz vdiqën dhe qindra të tjerë u plagosën, tri prej të cilëve me armë zjarri. Më pas, Iliesku falënderoi minatorët për veprimet e tyre.
Protestuesit qenë mbledhur në Bukuresht për të protestuar ndaj faktit se autoritetet post-komuniste rumune qenë në fakt, në shumicë, ish anëtarë të partisë komuniste që kishin ndryshuar parti. Protesta u shpërnda me dhunë kur Iliescu, gjithashtu një ish-anëtar i partisë komuniste, thirri minatorët me synimin që të sulmonin protestuesit.
Prokurorët hapën hetime mbi këto ngjarje në mars të këtij viti pasi Gjykata Europiane e të Drejtave të Njeriut kritikoi Bukureshtin se nuk e ka hetuar siç duhet dhunën.
Iliescu qe vënë nën akuzë më 2005 për vrasje dhe tentativë vrasje në lidhje me protestat por akuzat qenë tërhequr më 2007.