Rumania është i pari vend që muajin e ardhshëm do të pranojë kuotën e detyrueshme të migrantëve nga BE-ja, por shumica e popullatës është ende kundër pranimit të tyre.
300 refugjatët e parë do të mbërrijnë në Rumani në fillim të shkurtit nën kuotat e imponuara nga BE-ja për lehtësimin e krizës së refugjatëve në Europë – pavarësisht kundërshtimit të vazhdueshëm të publikut rumun.
“Të parët, rreth 300, do të vijnë nga Italia në fillim të muajit tjetër dhe më pas numri i tyre do të rritet me 50 çdo muaj,” tha Mircea Mocanu, shefe e Organizatës Ndërkombëtare për Migrimin në Rumani.
“Qeveria është gati t’i akomodojë ata, ka para për këtë,” shtoi Mocanu.
Rumania do të marrë rreth 4200 refugjatë në total, sipas një vendimi të marrë nga ministrat e brendshëm të BE-së në shtator. Rreth 120,000 refugjatë nga Lindja e Mesme dhe Afrika veriore do të shpërndahen në 28 vendet e BE-së sipas një skeme.
Bukureshti është ende kundër kuotave të detyrueshme, por zyrtarët thonë se vendi i tyre mund të menaxhojë numrin e refugjatëve që BE po planifikon të zhvendosë në Rumani.
“Unë ende besoj se kuotat e detyrueshme nuk janë zgjidhje për krizën e migrantëve në Europë. Por numri i refugjatëve që Rumania do të marrë nuk është i madh. Është i menaxhueshëm dhe mendoj se Romania duhet të tregojë solidaritet,” tha presidenti Klaus Iohannis në shtator.
Rumania do të hapë tre qendra për refugjatët, përveç gjashtë qendrave ekzistuese që kanë një kapacitet total prej 1500 vendesh, sipas të dhënave zyrtare.
Një sondazh i fundit ka sugjeruar se më shumë se gjysma e rumunëve, 56,2 për qind besojnë se Rumania duhet të mos pranojë asnjë refugjat dhe vetëm 35 për qind bien dakord të pranojnë disa.
Megjithatë, 82 për qind e atyre që mendojnë se Rumania duhet të pranojë refugjatë thonë se vendi duhet t’i vendosë vetë kuotat dhe të mos detyrohet të pranojnë një shifër të vënë nga Bashkimi Europian.
Më pak se 15 për qind besojnë se Rumania duhet të pranojë numrin e refugjatëve të kërkuar nga BE, sipas sondazhit të muajit të fundit.
Rumania nuk është goditur nga vala e refugjatëve dhe migrantëve që kalojnë Ballkanin drejt Europës Perëndimore. Vetëm 913 njerëz kanë aplikuar për azil vitin e shkuar, 12 për qind më shumë se 2014.
Megjithatë, autoritetet në kufi thanë të shtunën se kishin ndaluar 60 persona të cilët po përpiqeshin të hynin nga kufiri jug-perëndimor i Rumanisë në mënyrë ilegale, grupi më i madh në vitet e fundit.
Migrantët, të moshës 20 dhe 40 vinin nga Pakistani, Iraku, Afganistani, Somalia dhe Maroku. Policia kufitare i pikasi ata me pajisjet e sensorit të nxehtësisë.