Rreth 8000 punëtorë të industrisë së makinave në Rumani protestuan për të mbrojtur vendet e tyre të punës pas vonesës së qeverisë në ndërtimin e një autostrade.
Rreth 8,000 njerëz, shumica prej tyre anëtarë të sindikatës së fabrikës së makinave Dacia në Pitesti, dolën në rrugët e qytetit jugor të hënën për të protestuar rreth dështimit të qeverisë rumune në fillimin e punimeve për një autostradë të re në jug.
Projekti është diskutuar prej vitesh, por qeveria e shtyu atë disa herë për shkak të mosmarrëveshjeve për itinerarin më të mirë.
Punonjësit e Dacia tremben se mos grupi francez Renault, që është pronar i shumicës së kompanisë, mund të vendosë të mbyllë fabrikën në Pitesti dhe ta zhvendosë markën Dacia në Turqi ose Marok nëse autostrada nuk ndërtohet.
“Ndërtimi i autostradës jo vetëm që do të gjenerojë punë të reja, por gjithashtu do të na ndihmojë neve të mbajmë punët ekzistuese në Dacia,” tha lideri i sindikatës, Nicolae Pavalescu.
“Ne nuk e kuptojmë përse qeveria po e vonon ndërtimin, pasi duhen marrë fonde nga BE-ja për këtë,” shtoi ai.
Autostrada 120 kilometra Pitesti-Sibiu planifikohet të jetë pjesë e korridorit IV Pan-Europian, që kalon nga Deti i Zi në Rumaninë perëndimore.
Në prill të vitit të shkuar, qeveria e mëparshme e ish-kryeministrit Victor Ponta tha se do të përpiqej ta përfundonte autostradën në vitin 2020. Kostoja është llogaritur te 1.6 miliardë euro.
Nuk ka reagim zyrtar ndaj kërkesave të punonjësve të makinave nga qeveria teknokratike e Dacian Ciolos.
Rumania ka aktualisht 700 km rrugë të përfunduara – jo shumë për nga përmasat e vendit dhe është larg nga infrastruktura e parë në shumë vende të tjera të Europës Perëndimore.
Bukureshti ka lajmëruar planet për të ndërtuar rreth 725 km autostrada të reja dhe 1809 km rrugë ekspres në 15 vitet e ardhshme duke shpenzuar rreth 28.6 miliardë euro në infrastrukturën e varfër të vendit.
Rreth 6 miliardë euro priten të vijnë nga BE-ja. Pjesa tjetër do të merret nga huadhënësit ndërkombëtarë dhe nga taksat e tjera.
Në vitet e fundit, me ndihmë nga Bashkimi Europian, qeveritë janë përpjekur të përmirësojnë situatën, por asnjë nga projektet e reklamuara nuk është përfunduar ende.
Disa projekte janë shtyrë ose anuluar prej vonesave në pagesa nga qeveria.
