Rumania tha se do të paguajë 11 milionë euro për të blerë një skulpturë nga artisti i njohur rumun, Constantin Brancusi, skulpturë e cila ka qenë subjekt i një beteje të gjatë ligjore, por që ka rrëmbyer prej dekadash zemrat e popullit.
Saga e gjatë e “Urtësisë së Botës”, një nga veprat më elegante të artit të skulptorit modernist të lindur në Rumani, Costantin Brancusi, mund t’i jetë afruar fundit pasi qeveria rumune lajmëroi se synonte të blinte skulpturën pas vitesh mosmarrëveshje me pronarët e saj.
Qeveria po ofron 11 milionë euro për skulpturën, rreth 5 milionë euro nga buxheti i shtetit dhe do të lançojë një mbledhje fondesh publike për pjesën tjetër, lajmëroi të mërkurën në Facebook ministri i kulturës Vlad Alexandrescu.
Lajmërimi u përshëndet nga shumë rumunë, përfshirë dashamirësit e artit, që e shohin skulpturën si një imazh ikonë të vendit. Ish-regjimi komunist e përdori statujën në manuale historie dhe libra rreth identitetit kombëtar.
Por pronarët e statujës ende dyshojnë nëse qeveria do ta mbajë premtimin dhe do t’i paguajë. “Kur arritëm marrëveshjen për transaksionin, qeveria tha se e kishte të gjitha paratë. Tani, ministri tha se Bukureshti duhet të mbledhë para për të,” tha Bogdan Grabovski, avokat i pronarëve të skulpturës. “Qeveria ka vetëm 14 ditë kohë të paguajë të gjithë shumën,” shtoi ai.
Historia e statujës reflekton trazirat në kohët e moderne të Rumanisë. “Urtësia e Tokës” u gdhend në vitin 1907 nga Brancusi, që e kaloi shumicën e jetës artistike në Paris. Katër vite më vonë, Gheorghe Romascu, një inxhinier dhe dashamirës arti rumun e bleu atë.
Regjimi komunist e konfiskoi në 1957 dhe kështu u bë subjekt i një beteje të gjatë ligjore pasi regjimi komunist i Çausheskut ra. Në vitin 2008, vepra e artit iu kthye familjes së pronarit origjinal.
Pronarët vendosën ta shesin në 2014 dhe kërkuan 20 milionë euro. Shteti rumun, që ka të drejtën e parë ofroi si fillim 5 milionë euro. Negociatat që pasuan arritën në një marrëveshje këtë javë.
Statuja përfaqëson një grua, të gdhendur nga guri gëlqeror, që sheh në mënyrë enigmatike përpara. Është në ekspozim në Muzeun Kombëtar të Bukureshtit.
I njohur si babai i skulpturës moderne, Brancusi ishte një nga skulptorët më me ndikim të shekullit 20, si dhe një fotograf dhe piktor.
Rumania muajin e shkuar përkujtoi 140-vjetorin e lindjes së tij me shumë evente publike të organizuara në nder të skulptorit brenda dhe jashtë vendit.
Vitin e shkuar, një nga versionet e para të veprës “Muza që fle” e Brancusit doli në ankand për 9.12 milionë dollarë në Nju Jork.