BIRN Albania ka një program të përvitshëm me reportazhe të quajtur, Reporting Albania, një program i nisur në vitin 2014 dhe që synon të sjellë në vëmendjen e lexuesve raportime nga jeta e përditshme e shqiptarëve, veçanërisht në lidhje me zona apo ngjarje që në përgjithësi mbeten të paraportuara.
Pesëmbëdhjetë reportazhe u përgatitën për vitin 2015 nga dymbëdhjetë gazetarë, të cilët udhëtuan nga veriu në jug të vendit, nga bregu i detit deri në lartësitë e bjeshkëve verore, për të kapur fragmente nga jeta shqiptare me të gjitha të mirat dhe të këqijat që ajo mbart.
Vladimir Karaj udhëtoi për në Malin e Shebenikut, pranë Librazhdit, ku në lartësinë 1800-2000 metra mbi nivelin e detit raportoi mbi jetën e përditshme të barinjve që kalojnë verën duke u kujdesur për bagëtinë ndërsa na sjell edhe panoramat magjepsëse që ofron Parku Kombëtar Shebenik-Jabllanicë.
Rezarta Delisula shkoi në Kallmet të Lezhës për të folur me prodhuesit e verës që po përpiqen të rindërtojnë një traditë që vjen nga koha e Mesjetës dhe që i ka dhënë vetë emrin këtij fshati.
Besar Likmeta i bashkohet një grupi turistësh në një anije që niset nga Radhima për të vizituar ishullin e Sazanit, i cili për herë të parë është hapur për vizita nga shqiptarët e zakonshëm dhe që ofron një botë plot kontraste nga trashëgimia e kontrollit italian të ishullit te fortifikimet ushtarake të kohës së komunizmit dhe te bastisjet e vitit 1997.
Lindita Çela zgjodhi të shohë jetën e përditshme në ish – kampin e internimit të kohës së Komunizmit në Savër të Lushnjës, ku gjeti se për një pjesë të banorëve, jeta nuk ka ndryshuar shumë që nga rënia e Komunizmit për shkak të segregimit shoqëror që rëndon mbi të varfërit dhe romët.
Raimond Kola shfrytëzoi mundësinë që ofroi procesi i mirëmbajtjes së mozaikëve të Parkut Arkeologjik të Butrintit për të parë dhe fotografuar atë që zakonisht mbahet e mbuluar me rërë për ta mbrojtur nga shkatërrimi. Mes të tjerave, ai pa një mozaik i cili pati qëndruar i mbuluar që nga koha kur u zbulua për herë të parë në vitin 1928.
Bashkim Shala vizitoi punishten e Mane Cahanit në qytetin e Krumës për të parë përpjekjet e disa banorëve për të mbajtur gjallë dhe njëkohësisht për të rindërtuar ekonominë e punimeve artizanale në një nga zonat më të varfëra të Shqipërisë.
Anila Dushi na zbulon se si në kishën katolike të Bajzës në Malësinë e Madhe, vizitat në kishë janë kthyer edhe në një mundësi njohjesh shoqërore në një zonë të depopulluar ndjeshëm nga emigrimi i vazhdueshëm dhe ku djemtë emigrantë kthehen në pushimet e verës për të gjetur fatin e tyre të jetës.
Gjergj Erebara mori pjesë në festën fetare të fshatit të Sotirës në cepin jugor të Shqipërisë, festë e cila shërben si pikë takimi për banorët që mund të jenë shpërngulur prej dekadash nga fshati, por që shfrytëzojnë këtë festë për të mbajtur gjallë identitetin e vet në krahinën e Dropullit të Sipërm.
Ivana Dervishi iu bashkua grupeve të të rinjve aventurierë të apasionuar pas natyrës dhe sporteve ekstreme, për të fluturuar me velë të lirë (Tandem paragliding) nga Qafa e Llogarisë, për të eksploruar shtigjet e pashkelura të Shqipërisë së Mesme duke u kacavjerrë në Gryka e Murdharit, një monument natyror një kilometër i gjatë dhe 100 metra i thellë, i shtrirë në kufirin malor mes Tiranës dhe Elbasanit, si dhe me ngjitësit e shkëmbinjve të cilët testojnë nervat dhe fuqitë e veta në zonën e Brrarit në cepin verior të Malit të Dajtit.
Erjola Azizolli udhëtoi për në Bogovë të Skraparit ku turizmi malor i ka mundësuar jetesë të mirë një fshati të tërë, popullsia e të cilit është rritur.
Reporting Albania u realizua për herë të parë në vitin 2014. Edicioni i ardhshëm pritet të realizohet në gusht-shtator 2016.
