Një grup militantësh të Partisë Socialiste, më së shumti drejtorë në administratë publike, u mblodhën para Bashkisë së Kavajës mbrëmjen e së martës për të shprehur mbështetjen e tyre për kryetarin e sapodorëhequr të bashkisë Elvis Rroshi, i cili u detyrua të largohet si pasojë e ligjit për dekriminalizimin e skenës politike të vendit.
Ndërkohë, Kryeministri Edi Rama në një deklaratë plot pasion nuk shprehu pendesë për vendimin e tij për të kandiduar Rroshin dy herë në emër të Partisë Socialiste duke deklaruar se “nuk kishte pasur dijeni” për dënimet e tij penale.
“Duke i njohur dhe respektuar gjithnjë vështirësitë që të rinjtë shqiptarë kanë kaluar përmes dallgëve të larta të jetesës në emigracion, kam besuar dhe besoj se historia e Elvisit, apo Ervinit, ka qenë thjesht njëra nder historitë e panumërta të djemve që janë përplasur nëpër ato dallgë, duke jetuar mes ëndrrës për t’ia dalë dhe makthit të rikthimit mbrapsht. Ndërrime emri për të mos u kthyer mbrapsht, përzënie për qëndrim pa leje, kalime ilegale kufiri e me radhë, janë akte të paligjshme që në vitet ’90 i kanë bërë shumëe e shumë emigrantë në rrugën drejt ëndrrave të tyre,” deklaroi Rama.
Por Partia Demokratike në opozitë deklaroi se Rama po gënjen në lidhje me arsyet e dënimit të Rroshit në Itali, duke thënë se në fakt, Rroshi qe dënuar për dhunë seksuale në grup kur qe në moshëm 16 vjeçare dhe se ky është një dënim shumë i ndryshëm nga pretendimet e Rroshit për dënime për arsye emigrimi të paligjshëm.
“Dëshmia e penalitetit që është publikuar sot, e ardhur nga Ministria e Drejtësisë Italiane, thotë se Elvis Roshi është dënuar për “violenza carnale”, që do të thotë është dënuar për përdhunim,” deklaroi deputeti Edi Paloka i Partisë Demokratike.
Më pas, Opinion.al publikoi një dokument të drejtësisë italiane në të cilën shkruhet se Rroshi është dënuar në bazë të neneve 110 dhe 519 të Kodit Penal Italian. Neni 519 i Kodit Penal të Italisë përshkruan dënimin për dhunë seksuale ndërsa neni 110 flet për krimin e kryer në bashkëpunim.
Kryetari i Partisë Demokratike Lulzim Basha e deklaroi veten fitimtar për procesin e dekriminalizimit, i cili nisi me ekspozimin nga deputeti Genc Strazimiri i dënimit penal të mëparshëm të Arben Ndokës, një deputet i Partisë Socialiste në vitin 2014.
“Është një ditë e rëndësishme për një nga reformat më të rëndësishme në Republikën e Shqipërisë në këto 25 vite, më të rëndësishmen të këtyre 3 viteve,” deklaroi Basha.
Rroshi dha dorëheqjen mëngjesin e së martës pasi deklaroi se kishte mësuar papritur për një dënim që kishte marrë në Itali “pas një sherri të madh”, ndërsa aludoi se dënimi i dhënë ndaj tij nga drejtësia italiane qe i padrejtë.
“Sot duhet të ndaj publikisht me keqardhjen më të madhe, një informacion që më kakapur në befasi të plotë dhe ndryshon gjithçka. Avokatët e mi më kanë informuar, se papriturdhe pa kujtuar rezultojë të jem dënuar si minoren,”deklaroi Rroshi në faqen e tij në Facebook.
Kavaja, një bashki me 40 mijë banorë, do tëduhet të shkojë në zgjedhje të parakohëshme, bashkë me Dibrën, kryebashkiaku i së cilës u arrestua pak ditë më parë.
