Policia njoftoi arrestimin e dy personave me akuzë për grabitjen e dosjeve në Prokurorinë e Durrësit, por as policia as prokuroria nuk dhanë informacion nëse ishin gjetur materiale të grabitura.
Dy persona me precedentë të mëparshëm penalë u arrestuan nga policia mëngjesin e të premtes, të akuzuar për grabitjen në zyrat e prokurorisë së Durrësit. Policia njoftoi se përveç rojes private, kishte arrestuar “Artur Isan 49 vjeç dhe Besnik Bushin 54 vjeç”.
“Ata dyshohet kanë hyrë në zyrat e prokurorisë dhe kanë vjedhur, dëmtuar dokumentet dhe kanë ndërhyrë në sistemin kompjuterik”, thuhet në njoftimin e policisë së Durrësit. Komunikata nuk bën me dije nëse janë gjetur apo jo dokumentet nga ato që u vodhën në prokurori.
Policia tha se dy të arrestuarit kishin precedentë të mëparshëm penal, por nuk bëri me dije se për çfarë ishin dënuar ata më herët. Zëdhënësja e policisë së Durrësit Elona Muça i tha BIRN se kjo e fundit kishte ekzekutuar urdhërarrestet e lëshuara nga prokuroria dhe nuk kishin më shumë informacion rreth dy të ndaluarve. Po ashtu edhe koordinatorja për mediat e Prokuorisë së Durrësit nuk iu përgjigj pyetjeve dhe tha se “për momentin për shkak të hetimit të çështjes nuk kishin tjetër për të shtuar”.
Sipas policisë Nias Lena, roja i prokurorisë u arrestua me akuzën e shpërdorimit të detyrës, ndërsa dy të arrestuarit e tjerë akuzohen për “Ndërhyrja në sistemet kompjuterike” dhe “Zhdukja ose humbja e fashikullit” në bashkëpunim.
Ngjarja ndodhi mbrëmjen e të mërkurrës duke gdhirë e ejte dhe sipas një njoftimi për shtyp të Prokurorisë së Përgjithshme ambientet e Prokurorisë së Durrësit ishin sulmuar nga disa persona të cilët sipas saj kanë përdorur mjete të forta për të hapur derën e zyrës së serverit, kanë dëmtuar pajisjet e kamerave të sigurisë dhe po ashtu kanë thyer zyrën e një prokurori dhe një oficeri të policisë gjyqësore.
Bastisja e Prokurorisë së Durrësit dhe zhdukja prej saj e dosjeve të hetimit ndodh rreth dy javë pas vjedhjes ende pa autorë të postës së këtij institucioni-ngjarje kjo e ndodhur më 8 maj. Të dhënat e siguruara tregojnë se autorët dyshohet se kanë vjedhur dosje në hetim, materiale të serverit, regjistrime të kamerave të sigurisë por edhe kartat hyrëse dhe dalëse të personelit të Prokurorisë.
BIRN mësoi se zyra e sulmuar ishte e prokurorit Afrim Shehu është një ndër hetuesit më të vjetër të Prokurorisë së Durrësit. Përveç drejtimit të zyrës së task-forcës, ky prokuror kohët e fundit ka pasur nën hetim çështjen e falsfikimit të pronave në zonën e Gjirit të Lalzit. Katër ish-zyrtarë të Komunës së Ishmit u arrestuan si të dyshuar për abuzim me tokat në këtë çështje, ndërkohë që gjashtë persona të tjerë janë në hetim për të njëjtën çështje.
