Tregtarët e tregut industrial në Laç thonë se humbën miliona në mall pasi godina që shërbente si vend pune u përfshi nga flakët. Autoritetet ende nuk kanë bërë me dije shkakun e zjarrit, por tregtarët dyshojnë se ai ishte i qëllimshëm. Zjarrëfikësit shuan flakët pas më shumë se 2 orësh.
Tregtarët e tregut industrial të Laçit u zgjuan të hënën në mëngjes me lajmin se dyqanet e tyre ishin përfshirë nga flakët. Zjarri dyshohet se shpërtheu në orën 5.30 të së hënës, në zonën ku tregtoheshin rroba të përdorura. “Kur kam ardh, kam ardh tu qa me gjithë kalamaj”, tha për BIRN një tregtar i cili thotë se ka 15 vjet që punon në treg dhe se ka humbur mbi 10 milion lekë mall.
Flakët u shuan pas 2 orë e gjysëm, prej zjarrfikëseve nga Laçit, Lezha dhe Kruja. Zjarrfikësit po ashtu shmangën djegien e një banese ngjitur me tregun. Policia ka shoqëruar disa persona përfshi rojen e tregut, por ende nuk ka një komunikim zyrtar për shkakun e zjarrit.
Tregtarët dyshojnë se flakët janë vënë me qëllim për shkak të konflikteve të pronësisë mbi tokën. Edhe pse nuk përmendin emra ata thonë se janë kërcënuar më herët. “Ai (nuk përmend emër) ka një muaj rrjesht që paralajmëron: “Do t’iu vras do t’iu djeg”. Ça faj kena ne populli i shkretë se mezi e kena vu. I qëllimshëm është. E din shteti”, tha Vera Pjetri, e cila thotë se ka humbur rreth 7 milion lekë mall nga flakët.
Një pensionist që tha se punonte në treg bashkë me të shoqen për të ndihmuar fëmijët tha se kishin humbur gjithë mallin. “Në orën 6 e pak na njoftuan për zjarrin. E marrim mallin në Tiranë dhe vijmë e shesim këtu për të mbajtur familjen. Gjithçka ka qenë aty brenda është djegur. Kisha dy dyqane këtu, bashkë me bashkëshorten në dy tezga të ndryshme. Jam pensionist, por me këtë treg ndihmoja edhe fëmijët në shkollë”, thotë tregtari.
Në këtë treg zhvillonin aktivitetin rreth 70 tregtarë nga Laçi, të cilët thonë se kanë humbur gjithçka. “Komplet ca kena pas aty, ca kena punu ka 7-8 vite aty”, tha një grua tregtare. Në lidhje me ngjarjen policia njoftoi se ka nisur hetimet.
