Presidenti Ilir Meta dhe socialistët e udhëhequr nga Edi Rama hynë në një fazë të re përplasjesh të dielën, duke sinjalizuar një zgjerim të konfliktit mes dy ish-aleatëve.
Ndasitë mes qeverisë së Partisë Socialiste dhe Presidentit Ilir Meta u zgjeruan më tutje të dielën, kur Presidenti priti një grup protestuesish të Unazës së Re, të cilët kërkojnë të mbrojnë shtëpitë e tyre të kërcënuara nga shembja për shkak të planeve të qeverisë për të zgjeruar një segment rrugor në Unazën e Madhe të Tiranës.
Presidenti nxiti qeverinë të anulojë projektin, duke mbështetur në këtë mënyrë kërkesën e protestuesve dhe duke argumentuar se ligjet e vendit janë shkelur dhe procesi i prokurimit të punimeve në këtë segment është i dyshimtë. Në një analizë 15 faqëshe të ngjarjes, që u publikua në faqen e internetit të presidencës, Meta parashtron dhjetëra “shkelje” të të drejtave të njeriut dhe të procedurave të prokurimit.
Kryeministri Edi Rama iu përgjigj duke thënë se Presidenti është tashmë “drejtuesi më serioz i opozitës”.
“E vërteta është se IM është drejtuesi më serioz i opozitës.Kushtetutën e lexon njësoj si ata.Qeverinë e urren njësoj si ata. Rrëmujën e uron njësoj si ata. Po ndryshe nga ata, ai i ul vartësit të mbushin çarçafë me dokrra “ligjore””, shkroi Rama në Tëitter.
Kryebashkiaku i Tiranës Erion Veliaj, dikur i konsideruar një aleat besnik i Metës, ndërhyri në debat duke pretenduar se 99% e qytetarëve e duan projektin që të ecë përpara dhe se presidenti po mbështeste “alternativën e kaosit”.
Tedi Blushi, zëdhënës i Metës iu përgjigj duke thënë se “100% e qytetarëve janë të neveritur nga korrupsioni i pacipë” i projektit.
Meta u zgjodh president në vitin 2017 falë votave të deputetëve të partisë socialiste, me të cilët ishte në koalicion qeverisës që nga viti 2013. Gjithsesi, ish-partia e tij, Lëvizja Socialiste për Integrim, tashmë udhëhiqet nga bashkëshortja e tij Monika Kryemadhi dhe gjendet në opozitë.
Shqipëria ka hyrë në një vit elektoral ku zgjedhjet për pushtetin vendor janë planifikuar për datën 30 qershor. Aleancat e mundshme politike nuk janë ende të sigurta por pozicioni i LSI ka rezultuar me rëndësi në zgjedhjet e shkuara. Në vitin 2007, LSI ndihmoi Ramën të merrte një mandat të tretë si kryebashkiak i Tiranës ndërsa më 2011, ndihmoi kundërshtarin e tij Lulzim Basha për t’i mohuar Ramës mandatin e katërt. Mbështetja e LSI për Veliajn më 2015 konsiderohet e rëndësishme por jo vendimtare ndërsa pozicioni i LSI në zgjedhjet e ardhshme mund të komplikojë shanset e PS.
Tirana, ku Veliaj shpreson të sigurojë një mandat të dytë si kryebashkiak, konsiderohet me rëndësi të madhe në strukturën e pushtetit në vend për shkak të popullsisë së madhe dhe rolin disproporcional që ka në ekonominë kombëtare.
Qeveria po përballet me telashe të shumta nga projekti i unazës së madhe të Tiranës. Një grup i vogël por me zë protestuesish ka bllokuar rrugën çdo mbrëmje përgjatë tre muajve të fundit në përpjekje për të mbrojtur shtëpitë e veta nga shembja.
Një nga kontratat e punimeve u fitua nga një kompani fantazmë e quajtur DH Albania ndërsa dyshime janë ngritur edhe për dy kontratat e tjera, të cilat u fituan pa konkurrencë serioze nga dy kompani shqiptare. Për momentin, qeveria nuk ka ecur përpara me planet për shembje banesash apo me fillimin e punimeve.
Dy nga tre kompanitë fituese të tenderëve kanë marrë këstet e para për punimet në dhjetor. Zyrtarisht punimet duhet të zgjasin 24 muaj por tre muaj pas nënshkrimit të kontratave ato nuk kanë filluar ende.
Lexo më shumë:
Dokumenti dhe njerëzit pas DH Albania nxjerrin zbuluar kompaninë e Bashkim Ulajt
Anulohet tenderi për mbikalimin te Unaza e Re
“Të prerë në besë”, banorët e Unazës së Re akuzojnë qeverinë për standarde të dyfishta
Hapen tenderët 40 milionë euro për tre mbikalime në Unazën e Re
