Gjykata vendosi me masë sigurie “detyrim paraqitje” për një 25-vjeçare të arrestuar për përhapje paniku, por e cilësoi arrestimin e saj të ligjshëm.
Në një seancë gjyqësore të tensionuar dhe në një sallë në të cilën dukeshin plasaritjet dhe që u shkund nga lëkundje tërmeti në 2.8 shkallë rihter gjatë gjyqit, Gjykata e Durrësit cilësoi të ligjshëm arrestimin e Xhuljana Aliajt, 25 vjeç dhe vendosjen e masës së sigurisë “detyrim paraqitje” ndaj saj.
Aliaj akuzohet “për përhapje të panikut”, pasi në profilin e saj në Facebook shpërndau lidhje nga një media italiane dhe bëri një status në të cilin shprehej për evakuim të një zone në Durrës. Mbrojtja mohoi akuzën dhe kërkoi që arrestimi të konsiderohej i paligjshëm.
Prokurori Madrid Kullolli që kërkoi ndaj Aliajt masë sigurie “detyrim paraqitje” e justifikoi atë në seancë. Prokurori tha se “Duhet kuptuar ankthi i Xhulianës dhe se nuk ka patur si qëllim përhapjen e panikut, por e ka bërë (statusin) në nxitim e sipër”. Ai tha se duhej marrë parsysh arsimi dhe fakti që ishte banore e prekur nga lëkundjet, por shotoi se kishte nevojë të vijonte verifikimin dhe për këtë kërkoi masën e sigurisë.
Nga ana tjetër avokati i të resë kërkoi lirimin e saj nga çdo masë sigurie, ndërsa fajësoi policinë për panikun. “Paniku është përhapur pas arrestimit. Kush është lidhja shkak-pasojë? Është kujdesur për komunitetin. Vepër penale do të ishte gjithashtu nëse Xhuljana do ta kishte këtë informacion dhe nuk do të njoftonte”, tha avokati Stefan Topalli.
Në seancë ishin të pranishëm të afërm të 25 vjeçares dhe pjesëtarë të famullisë së Kishës Katolike në të cilën ajo ishte pjesë, anëtarë të shoqërisë civile dhe përfaqësues të opozitës.
Babai i të arrestuarës Fatmir Aliaj tha pas seancës se e konsideronte të rëndë dhe kriminal arrestimin e të bijës nga policia. Ai tha se ajo ishte arrestuar pa asnjë fakt pa asnjë bazë. “Tërmet ka qenë ky për mua”, ndërsa tha se Xhuliana e ka përjetuar edhe më keq. Ai u ankua se e bija ishte arrestuar me 5 furgona policie.
Ndërsa famulltari i Kishës së Shën Domenikut të Kishës Katolike, Durrës të cilën Xhuliana e frekuenton tha se ajo nuk ka vepruar me dashakeqësi. “Qëllimi që të bëjmë diçka dhe të mos rrimë pasiv”, tha ai.
Gjyqtari Paulin Çera pasi dëgjoi palët, vendosi të konsiderojë të ligjshëm arrestimin dhe nga ana tjetër lërë 25 vejçaren e cila ka mbaruar studimet në ekonomi me masë “detyrim paraqitjeje”.
Arrestimi i të resë u pasua me shumë reagime në rrjetet sociale, ndërsa ai u pa si vijim i përpjekjes së qeverisë për të kontrolluar me forcë mediat.
