Policia e Durrësit ndaloi paraditen e së enjtes 1 prej 8 dyshuarve të shpallur në kërkim si përgjegjës për shtatë ndërtesat e shkatërruara nga tërmeti i 26 nëntorit, që shkaktuan 23 viktima në qytetin e Durrësit.
Sipas njoftimit të policisë u ndalua Aldo Dakoveli, ish-shef sektori në Kadastrën e Durrësit. Për 30-vjeçarin Gjykata e Durrësit ka dhënë masën e sigurisë “Arrest me burg”, për veprën penale “Shpërdorim detyre”.
Policia njoftoi se ndalimi i tij erdhi, “në kuadër të kryerjes së veprimeve për dokumentimin e paligjshmërisë dhe mbledhjen e provave në objektet e shkatërruara dhe të dëmtuara nga tërmeti”.
Dakoveli është i dyshuari i parë që arrihet të ndalohet 6 muaj pas shpalljes në kërkim të 8 zyrtarëve publik dhe ndërtuesve. Në fillim të muajit prill u vetëdorëzua ish-kreu i ALUIZN-it Durrës, Flamur Gjuzi, i dyshuar për “Shpërdorim Detyre”. Ndaj Gjuzit Gjykata e Durrësit – në kuadër të situatës së krijuar nga COVID-19 për shpopullimin e burgjeve, vendosi si masë sigurie atë të arrestit në shtëpi, nga arrest me burg që kërkoi prokuroria, ndërsa Apeli i Durrësit e ndryshoi masën në detyrim paraqitje.
Ndër të tjera Aldo Dakoveli dyshohet nga Prokuroria për firmosjen e lejes së legalizimit për Hotel Mira Maren, ku humbën jetën 2 persona, ndërsa Gjuzi dyshohet për firmosjen e një sërë dokumentesh që sollën legalizimin e shtesës prej 26 m2 të lokalit në katin e parë të një pallati që u shemb në lagjen 6, duke zënë nën rrënoja 2 banore.
Gjykata e Durrësit në dhjetor të vitit 2019 la në burg 9 personat e arrestuar si përgjegjës për shembjen e ndërtesave që shkaktuan viktima pas tërmetit në Durrës, mbi të cilët rëndojnë akuzat për “Shpërdorim Detyre”, “Ndërtim të Paligjshëm” dhe “Vrasje me Dashje”. Gjykata e Apelit lehtësoi masat e sigurisë në “Detyrim paraqitje” për disa prej të ndaluarve.
BIRN zbuloi më herët se betoni i dobët dyshohet si shkak për disa nga viktimat e tërmetit. Prokuroria e Durrësit po shqyrton të dhënat laboratorike të materialeve të ndërtimit nga 7 ndërtesat e shkatërruara nga tërmeti i 26 nëntorit, për të zbuluar përgjegjësit e vdekjeve tragjike të 23 personave nën rrënojat e tyre.
BIRN mësoi nga Prokuroria Durrës se hetimi vijon megjithëse me ritme të ulëta edhe për shkak të pezullimit të punës nga situata që krijoi SARS-CoV-2. Hetimi përveç godinave që u shembën dhe sollën humbjet e jetës është orientuar edhe drejt pallateve që pësuan dëmtime të rënda nga lëkundjet sizmike të 26 nëntorit, që i morën jetën 51 personave në të gjithë vendin.
Prokuroria për disa prej të ndaluarve dhe personave të shpallur në kërkim po heton edhe për dyshimet e veprave “Vrasja me Dashje” dhe “Vrasja në Rrethana të Tjera Cilësuese”.
Gjykata e Apelit në Durrës liroi një pjesë të të ndaluarve. Për drejtorin e Kavalishencës në Durrës, Ahmet Doda, specialistin e ALUIZNI-it, Albrend Qetkën dhe arkitekten Nevjana Isufi, u ndryshua masa e sigurisë nga “Arrest me Burg” në “Detyrim Paraqitje”. Më herët një prej të ndaluarve u lirua për arsye shëndetësore, duke lënë në burg 5 nga 9 personat e ndaluar.
“Theksojmë faktin se disa prej personave, për të cilët Prokuroria ka lëshuar urdhër-ndalimi janë larguar jashtë shtetit menjëherë pasi ra tërmeti”, u njoftua për mediat gjatë një konference të drejtueses së Prokurorisë dhe drejtorit të Policisë së Durrësit.
Në kërkim janë ende ish-zyrtarë të Kadastrës Durrës, pronarët e një prej hoteleve që u shemb në zonën e Shkëmbit të Kavajës, pronari i një prej lokaleve të ndërtuar në katin e parë të një pallati të periudhës së socializmit dhe zyrtarë të tjerë vendor.
