Gjashtë persona kanë humbur jetën në ngjarje të veçuara kriminale të hënën, duke lënë pas javë qetësie të ndikurara nga vetëizolimi i diktuar nga pandemia e COVID-19.
Dy vëllezër në qytetin e Durrësit mbetën viktima të një atentati me armë zjarri pasditen e së hënës. Automjeti i tyre tip “Volksëagen” u qëllua teksa po lëvizte sapo kishte lënë Tregun e Automjteteve në fshatin Shën Vlash dhe po ngjiste urën në drejtim të Shkozetit.
“Rreth orës 16:40, në rrethana ende të paqarta kanë humbur jetën në një mjet dhe dyshohet si pasojë e përdorimit të armës së zjarrit shtetasit V.H dhe M.H (vëllezër)”, njoftoi Policia e Durrësit për mediat.
BIRN konfirmoi zyrtarisht nga policia se bëhet fjalë për vëllezërit Besmir dhe Viktor Haxhia. Ky i fundit rezulton të jetë i licensuar si avokat dhe biznesmen në fushën e transportit dhe tregtimit të automjeteve që prej vitit 2018 përmes subjektit “BV auto”, ku punonte së bashku me vëllain. Më herët ai tregtonte veshje përmes një dyqani në një prej qendrave tregtare në Tiranë. Dhoma Kombëtare e Avokatisë nuk ishte e arritshme për të konfirmuar licensën në avokati të Viktor Haxhisë.
Policia njoftoi mbërritjen nga Tirana të Forcave Speciale Renea dhe Forcave të Ndërhyrjes së Shpejtë për të krehur zonën. “Ndërkohë që në hyrje-daljet kryesore dhe rrugët dytësore forcat e policisë po ushtrojnë kontrolle të shumta të personave dhe automjeteve që lëvizin në këtë zonë”, shtoi njoftimi i policisë.
BIRN mësoi nga Policia Durrësit se aktualisht po realizohet kqyrja e kamerave të sigurisë në zonë me qëllim identifikimin e atentatorëve, teksa ende nuk është mësuar e shkuara e dy vëllezërve apo pistat ku janë fokusuar hetimet.
Ish-deputeti i Partisë Demokratike reagoi përmes një statusi në Facebook, duke akuzuar qeverinë për propagandë përmes masave policore dhe ushtarake të marra dhe jo për efikasitet të tyre në ruajten e jetës së qytetarëve.
“Sot kushdo e kupton që masat e qeverisë janë për të izoluar të varfërit, qytetarët që respektojnë ligjin, bizneset e ndershme, ndërkohë që kriminelët me armë lëvizin lirshëm dhe vrasin ditën për diell”, shkruajti Salianji.
Në këtë zonë periferike të Durrësit u regjistrua një tjetër ngjarje kriminale në fillim të muajit mars, ku dy persona me të shkuar kriminale u ekzekutuan me armë zjarri kallashnikov.
Shqipëria regjistori një seri vrasjesh dhe vetëvrasjesh të dyfishta të hënën. Në fshatin Lalm i Vjetër të Lezhës, u gjetën pa shenja jete dy burra rreth të gjashtëdhjetave që dyshohet se janë qëlluar me armë. Në Elbasan një biznesmen dyshohet se u vetëvra, ndërkohë në Përrenjas një 28-vjeçar që mendohet të jetë djali i një biznesmeni, dyshohet se gjithashtu u mori jetën vetes.
