Tre minatorë u asfiksuan dhe një prej tyre u transportua në gjendje të rëndë në Tiranë. Minatorët janë asfiksuar nga rrjedhja e gazit prej një gjeneratori të cilin po e përdornin për të salduar brenda në galeri.
Tre minatorë u plagosën dhe njëri prej tyre u nis me helikopter drejt Tiranës në gjendje të rëndë, pas një aksidenti rreth orës 12:30 në një nga galeritë e kromit në zonën e Martaneshit në Bulqizë.
Policia njoftoi se Sh. E., rreth 50 vjeç, duke salduar brenda në galeri me gjenerator, si pasojë e gazit të çliruar nga gjeneratori është aksifksuar. “Në ndihmë të tij kanë shkuar dhe dy punëtorë të tjerë, shtetasit A. J., dhe M. H., të cilët janë askfiksuar dhe kanë shfaqur probleme shëndetësore. Shtetasit e lartëpërmendur janë nxjerrë nga galeria dhe janë transportuar për ndihmë mjekësore në spital,” thuhet në deklaratën e Policisë së Shtetit.
Të plagosurit janë dërguar për të marrë ndihmë mjekësore në spitalin e Bulqizës dhe mjekët kanë konstatuar se njëri prej tyre ndodhej në gjendje më të rëndë. Minatori që ishte në gjendje të rëndë është dërguar me helikopter drejt Tiranës, për të marrë ndihmë mjeksore të kualifikuar. Burime nga spitali i Bulqizës i thanë BIRN se të plagosurit ishin të asfiksuar nga gazi.
Sipas Inspektoriatit të Punës në Dibër, galeria ku ndodhi aksidenti menaxhohej nga kompania XHIRETON shpk. Kjo e fundit nuk qe e arritshme deri në publikimin e shkrimit.
Aksidentet në zonën minerare të Bulqizës janë shpeshta. Dy minatorë dhe një inxhinerë u gjetën të vdekur në galerinë ku punonin në Selishtë të Dibrës në dhjetor 2020 si pasojë e asfiksisë nga gazi.