Një 15-vjeçar dhe një person “me dijeni” janë arrestuar nga policia e Shkodrës që ka shpallur në kërkim për të disatën herë Ibrahim Licin, akuzuar edhe më herët për vrasje të rivalëve.
Policia e Shkodrës njoftoi të martën se kishte zbardhur vrasjen e 31 vjeçarit Endri Mustafa, i cili u gjet i vdekur buzë Liqenit të Shkodrës, tre ditë pasi ishte zhdukur. Policia njoftoi se kishte arrestuar një 15-vjeçar të identifikuar si E.Malja dhe Edison Arazin, 26 vjeç, që akuzohen prej saj se kanë bashkëpunuar me autorin e dyshuar.
Për krimin policia shpalli në kërkim Ibrahim Licin, 28 vjeç. Lici ka qenë në kërkim edhe më herët për krime të ngjashme në Shkodër, por deri se fundmi ndaj tij nuk ka pasur çështje gjyqësore dhe ai nuk është arrestuar. “Në bazë të provave të grumbulluara u bë shpallja në kërkim e shtetasit I. L., 28 vjeç banues në lagjen Guerrile, Shkodër, i dyshuar si autor i vrasjes së shtetasit E. M”, thuhet në njoftimin e policisë.
Mustafa Lici, babai i të akuzuarit në një deklaratë për mediat, mohoi akuzat ndërsa fajësoi fisin kundërshtar të Bajrit për vrasjen. Lici akuzoi policinë se kishte marrë krahun e kundërshtarëve.
Një seri vrasjesh që kanë filluar në Shkodër në vitin 2017, me gati 10 viktima, dyshohet se kanë për shkak përplasjen mes fiseve Lici dhe Bajri. Viktima Endri Mustafa ishte fqinj me familjen Lici. Njëkohësisht ai ishte një ndër të arrestuarit për armëmbajtje pa leje dhe një grabitje në vitin 2016 sëbashku me vëllezërit Astrit e Brahim Bilali, të cilët u vranë në vitin 2019.
Bashkëshortja e viktimës Ingrit Mustafa tha për gazetarë se nuk akuzonte familjen Lici për vrasjen.
“Nuk kemi pasur asnjë problem. Burri im ishte shok me djemtë e tij. Më ka pyetur policia dhe u kam thënë se nuk kanë asnjë lloj lidhje. Ne jemi kojshij dhe nuk kemi pasur asnjë problem”, tregon e veja e Mustafës. Gruaja thotë se dinte vetëm që bashkëshortin e kishte nxjerrë nga shtëpia 15-vjeçari i arrestuar, por thotë se nuk i di arsyet.
Në një reagim të dytë për mediat, pas një telefonate të marrë nga fisi Bajri, bashkëshortja e viktimës doli të shfajësonte edhe këta të fundit. “Po na fusin në konflikt fisesh. Na kanë marrë fisi i Bajrave dhe na kanë thënë ne nuk kemi lidhje me ngjarjen”, tha Mustafa, ndërsa i kërkoi Prokurorit të Përgjithshëm të zbardhte ngjarjen.
Gruaja thotë se dinte vetëm që bashkëshortin e kishte nxjerrë nga shtëpia 15-vjeçari i arrestuar, por thotë se nuk i di arsyet.
Sipas bashkëshortes së viktimës ky i fundit ishte në kërkim nga policia dhe nuk kishte qenë për një kohë të gjatë në shtëpi. Ajo thotë se ai ishte kthyer në banesë për të takuar fëmijët vetëm pak kohë para Bajramit.