Policia e Durrësit zbuloi një bazë për përpunimin dhe shpërndarjen e drogërave të forta, si kokainë dhe heroinë, e cila ishte vendosur në një banesë të marrë me qira.
Pas realizimit të operacionit policor të koduar “Baza”, policia gjeti 408 gramë lëndë narkotike të dyshuar si heroinë, 11.5 gramë lëndë narkotike të dyshuar si kokainë, 1 pistoletë, municion luftarak, si edhe para në shumën 73.940 lek dhe 49 euro.
Policia arrestoi 32 vjeçarin me iniciale K. Xh. dhe 33 vjeçarin me iniciale E. V., i dënuar më parë për veprat penale “Moskallëzim krimi” dhe “Prodhimi dhe shitja e narkotikëve”.
Ata banonin në Durrës dhe së bashku kishin marrë me qira një banesë në lagjen numër 8 dhe e kishin përshtatur atë për përpunimin dhe shpërndarjen e lëndëve narkotike, të cilën e përgatisnin për shitje në qytetin e Durrësit në doza të vogla.
Policia njoftoi se nën drejtimin e Prokurorisë Durrës po vijon puna për identifikimin dhe kapjen e personave të tjerë të përfshirë në këtë veprimtari kriminale.
Pak ditë më parë, më 3 gusht Policia e Durrësit pas kontrollit në një ambient në lagjen numër 15 të qytetit zbuloi disa objekte dhe sende të jashtëligjshme, ndër to një sasi me lëndë narkotike “Cannabis sativa”, grirëse hashashi, armë dhe objekte antike.
Ndërsa një 29 vjeçar në po të njëjtën ditë u arrestua nga policia në lagjen numër 7, pasi gjatë kontrollit fizik ju gjet në çantën e dorës një sasi dozash me lëndë narkotike të dyshuar si heroinë dhe kokainë, si edhe para që dyshohet se i kishte përfituar nga shitja e lëndës narkotike.