Një lidhje e paligjshme energjie ka zbuluar një serë për prodhimin e kanabisit në Kurbin. Policia arrestoi 3 kultivues dhe katër punonjës të OSHEE që dyshohet se kishin mundësuar lidhjen e paligjshme të energjisë.
Për herë të dytë në më pak se një muaj një lidhje e paligjshme energjie e ka çuar policinë drejt një sere me kanabis. E ashtuquajtura “shtëpi bari” u gjet në fshatin Bushnesh të Kurbinit, ndërsa policia njoftoi arrestimin 3 të akuzuarve për kultivim të kanabisit dhe 4 elektricistëve të OSHEE të cilët kishin mundësuar lidhjen e energjisë nga një kabinë elektrike në serën që ngrohej me llamba.
“U bë i mundur finalizimi me sukses i operacionit anti-kanabis të koduar “Bushneshi”, gjatë të cilit u bë arrestimi në flagrancë i shtetasve: L. A., 54 vjeç, banues në Bushnesh, Kurbin, T. B., 27 vjeç, banues në Arrameras, Fushë Krujë dhe G. H., 43 vjeç, banues në Tetovë. Arrestimi i këtyre shtetasve u bë për veprat penale “Kultivimi i bimëve narkotike”, “Prodhimi dhe shitja e narkotikëve” dhe “Vjedhja e energjisë elektrike”, kryer në bashkëpunim”, thuhet në njoftimin e policisë.
Sipas policisë të dyshuarit kishin përshtatur katin e parë të një banese në një serë me llamba, ku në momentin e operacionit u gjetën dhe u sekuestruan 506 bimë të dyshuara narkotike të kultivuara në vazo dhe 58 kilogramë e dyshuar kanabis.
Tre elektricistë dhe një faturist i zonë u arrestuan po ashtu pasi dyshohet se kanë lejuar lidhje të paligjshme të energjisë elektrike direkt në transformatorin elektrik që furnizonte me energji ndërtesën e përshtatur për kultivimin e bimëve narkotike.
Në ndërtesë u kapën llamba, aspirator, filtra ajrimi dhe pajisje të tjera ndihmëse në kultivimin e bimëve narkotike. Ky është rasti i dytë pas sekuestrimit të një bodrumi në Shkodër që po ashtu u zbulua për shkak të lidhjes së paligjshme të energjisë.
